Bakının ABU həndbol komandasının Çellenc kuboku yarışlarının səkkidəbir final mərhələsindəki potensial rəqibləri müəyyənləşmişdir
Bakı, 18 noyabr (AZƏRTAC). Qadın həndbolçular arasında Çellenc kuboku yarışlarının 1/8 final mərhələsinin püşkatma mərasiminin vaxtı müəyyənləşmişdir.
AZƏRTAC xəbər verir ki, üçüncü mərhələni uğurla adlayan Bakının ABU komandasının növbəti rəqibi noyabrın 19-da atılacaq püşkatmada aydınlaşacaqdır.
Artıq 1/8 finalın bütün iştirakçıları da məlumdur. Azərbaycanın avrokuboklardakı yeganə təmsilçisi ABU-nun 15 potensial rəqibinin adı açıqlanmışdır.
Belə ki, Yunanıstanın “QAS Meqas Aleksandros” klubunu iki oyunun cəmində 60:39 (32:21 və 28:18) məğlub edən bakılılar kimi daha 8 komanda III mərhələni uğurla adlamışdır. Bunlar “Dnepyanka” (Ukrayna), “Naisa-Niş” (Serbiya), “Slaviya” (Çexiya), “Maltəpə” (Türkiyə), “Biqanos-Beqles” (Fransa), “Bazel” (İsveçrə), “Kollecio de Qaya” (Portuqaliya) və “Hoor” (İsveç) klublarıdır.
Onlardan başqa, daha 7 komanda 1/8 finalda iştirak edəcəkdir. Bunlar mübarizəyə birbaşa bu mərhələdən qoşulan komandalardır. Belə ki, “İssi” (Fransa), “Ardesen” (Türkiyə), “Sokol” (Çexiya), “Jelina” (Xorvatiya), “Qaliçanka” (Ukrayna), “Quintus” (Hollandiya) və “Millenium” (Serbiya) ilkin mərhələdən azad idilər.
Bölmənin digər xəbərləri
