MƏDƏNİYYƏT
“Baku Fashion Week” ikinci mövsümünü açıb
![](/files/galleryphoto/2024/2/1200x630/1716731806769222584_1200x630.jpg)
![](/files/galleryphoto/2024/2/1200x630/17167318063807138032_1200x630.jpg)
![](/files/galleryphoto/2024/2/1200x630/17167318063774459345_1200x630.jpg)
![](/files/galleryphoto/2024/2/1200x630/17167318065332617682_1200x630.jpg)
![](/files/galleryphoto/2024/2/1200x630/17167318064200954507_1200x630.jpg)
![](/files/galleryphoto/2024/2/1200x630/17167318061280710152_1200x630.jpg)
![](/files/galleryphoto/2024/2/1200x630/171673180657559224_1200x630.jpg)
![](/files/galleryphoto/2024/2/1200x630/17167318062416624974_1200x630.jpg)
![](/files/galleryphoto/2024/2/1200x630/1716731806370929984_1200x630.jpg)
![](/files/galleryphoto/2024/2/1200x630/17167318061832538486_1200x630.jpg)
![](/files/galleryphoto/2024/2/1200x630/1716731806471024348_1200x630.jpg)
Bakı, 27 may, AZƏRTAC
“Baku Crystal Hall” kompleksində “Baku Fashion Week” moda həftəsinin ikinci mövsümünün açılışı olub.
AZƏRTAC xəbər verir ki, “Baku Fashion Week” çərçivəsində moda nümayişlərinin birinci gününü azərbaycanlı dizayner Sultan Qədimbəyli açıb. Onun dizaynları ölkəmizdə və Türkiyədə tanınır. Moda geyimləri dizaynı sənətinin həvəskarları dizaynerin təqdim etdiyi və ilk günün açılış əhvali-ruhiyyəsinə xüsusi ovqat qatan obrazların mürəkkəb tikiş üslubunu layiqincə qiymətləndiriblər.
Ölkənin moda sənayesinin inkişafı tendensiyasını diqqətlə izləyən insanlar artıq model və bloger Kamilla Babayevanın yaratdığı “L’Arc” brendini rəğbətlə qarşılayıblar. Bu brend hər mövsümdə qadınlığı və zərifliyi ilə seçilən obrazlar nümayiş etdirir. Əgər əvvəllər “L'Arc”da dəbdəbə və parlaqlıq kimi brend texnikalarını görmüşdüksə, bu mövsümdə çiçək mövzuları üstünlük təşkil edib və tamamilə yeni bir üslubdan istifadə olunub. Çiçəklər “L'Arc” brendinin geyimlərini həm parçalar üzərində çap şəklində, həm də əllə işlənmiş qönçələr şəklində bəzəyib, əl istehsalı olan modelyer işinin gözəl nümunəsinə çevrilib.
Qısa fasilədən sonra “Baku Fashion Week”in ən çox sürpriz vəd edən iştirakçısı - “Other Azer” brendi ikinci kolleksiyasını nümayiş etdirib.
Nümayiş “Baku.tv RU”nun baş redaktoru Nata Osmanlının üzünü maska arxasında gizlədən brend dizayneri ilə yumoristik müsahibəsi ilə başlayıb. “İşıqla qaranlıq arasında” adlanan kolleksiya, adından da aydın olduğu kimi, açıq və tünd çalarların, eləcə də axşam və “casual” görünüşlərin mübarizəsinin təzahürü olub. Şou brend dizaynerinin bu nümayiş üçün xüsusi olaraq yaratdığı sözlü və musiqili trekin müşayiəti ilə başa çatıb.
Şouların ilk gününə yekun vurmaq şərəfi 1997-ci ildə fəaliyyətə başlayan və Rusiyadan xüsusi olaraq dəvət olunmuş “Viva Vox” moda evinə verildi. Brendin 2024-2025-ci illər payız-qış mövsümü üçün avanqard və qeyri-adi kolleksiyası fərqli təqdimata malik olub və heç kəsi biganə qoymayıb. Təqdim olunan əsərlərin seçilən xüsusiyyəti orijinal çap üsullarından istifadə, parçalar və dəri materialları ilə işləməkdə misilsiz bacarıqdan ibarətdir.
Şouların ilk günü, həmçinin “Makulatura Live” yaradıcı birliyi ilə birgə “Baku Crystal Hall” mətbuat mərkəzinin divarları arasında keçirilən əyləncəli “afterparty” ilə başa çatıb. Ölkənin moda həftələri tarixində ilk dəfə olaraq, əsas moda tədbirinin podiumu rəqs meydançasına çevrilib, BFW-nin qonaqları burada DJ Bunbek və Cənubi Afrikadan olan xüsusi qonaq DJ Kasanqonun hazırladıqları setlərlə əyləniblər.
“Baku Fashion Week”in ikinci mövsümünün dəvətli qonaqları arasında yerli və xarici blogerlər, influencerlər, eləcə də yaxın və uzaq xaricdən gəlmiş moda ikonları var. Onların arasında rusiyalı model, teleaparıcı Svetlana Bondarçuk, məşhur bloger, Qırğızıstandan olan Zee və bir çox başqaları var. “Harper’s Bazaar”, “L’Officiel” və “Hello” kimi dünyaca məşhur media nümayəndələri də öz iştirakları ilə BFW-ni şərəfləndiriblər.
“Baku Fashion Week” moda həftəsi tədbiri “ModePoint” və “Stock” tərəfindən təşkil olunur. “ModePoint” ölkəmizdə moda sənayesinin inkişafına dəstək olmaq, həm Azərbaycanın daxilində, həm də xaricdə moda tədbirlərinin təşkili məqsədilə yaradılmış layihədir.
“Stock”, öz növbəsində, 100-dən çox Azərbaycan brendini birləşdirən və ilk geniş moda platforması rolunu oynayan konseptual mağazadır. Onun əsas məqsədi yerli moda sənayesinin inkişafını təşviq etmək, gənc dizaynerləri dəstəkləmək və yerli brendləri qlobal səviyyəyə çatdırmaqdır.
“Baku Fashion Week”in ikinci mövsümü Azərbaycan Respublikası Mədəniyyət Nazirliyi və Azərbaycan Turizm Şurasının dəstəyi ilə keçirilir.