BDU Sloveniya Respublikasının Nova Gorica Universiteti ilə əməkdaşlığa başlayır
Bakı, 22 dekabr, AZƏRTAC
Bakı Dövlət Universiteti (BDU) və Sloveniya Respublikasının Nova Gorica Universiteti arasında əməkdaşlığa dair anlaşma memorandumu imzalanıb.
Sənədi BDU-nun rektoru Elçin Babayev və Nova Gorica Universitetinin rektoru Bostjan Golob imzalayıb.
BDU-dan AZƏRTAC-a bildirilib ki, memorandum hər iki universitetin nəzdində fəaliyyət göstərən fakültə, institut və kolleclərdə təlim-tədris prosesinin təkmilləşdirilməsi və beynəlxalq standartlara uyğunlaşdırılması məqsədilə birgə layihələrin həyata keçirilməsini nəzərdə tutur. Bu çərçivədə konfrans, sərgi, seminar, simpozium, qısamüddətli kurslar və təlimlərin təşkili, ortaq elmi-tədqiqatların aparılması planlaşdırılır.
Sənəddə, həmçinin elmi jurnallarda birgə nəşrlər, ortaq akademik proqramların, tədris planlarının və sillabusların hazırlanması, təlimlərin keçirilməsi, akademik və inzibati heyətin, tələbələrin, magistrantların, doktorantların və tədqiqatçıların qarşılıqlı mübadiləsi kimi məsələlər əksini tapıb.
Əsası 2001-ci ildə qoyulmuş Nova Gorica Universiteti “Times Higher Education” (THE) reytinqində 2026-cı il üzrə 801-1000-ci sıralarda yer alır.
Bölmənin digər xəbərləri
