“Beynəlxalq dəniz günü” ilə əlaqədar Sumqayıtda ekoloji tədbirlər keçirilmişdir
Bakı, 26 sentyabr (AZƏRTAC). Hər il sentyabr ayının sonuncu həftəsi qeyd olunan “Beynəlxalq dəniz günü” ilə əlaqədar Ekologiya və Təbii Sərvətlər Nazirliyi (ETSN) tərəfindən mədəni-kütləvi tədbirlər davam etdirilir.
Nazirliyin mətbuat xidmətindən AZƏRTAC-a bildirmişlər ki, sentyabrın 26-da Sumqayıt şəhərinin 1 və 9 saylı tam orta məktəblərində “Xəzərin ekoloji mühitinin yaxşılaşdırılması istiqamətində görülən işlər” mövzusunda tədbirlər keçirilmişdir. Bundan əlavə, ETSN-in mütəxəssislərinin su hövzələrinin zənginliyi, dənizin ekoloji cəhətdən saflığının və davamlılığının qorunması, onun sərvətlərinin mühafizəsi, eləcə də bu istiqamətdə görülən işlər barədə ictimaiyyəti maarifləndirmək məqsədi ilə regional televiziyalarda çıxışları olmuşdur.
Eyni zamanda, nazirliyin nümayəndələrinin, yerli bələdiyyələrin və ictimaiyyət nümayəndələrinin iştirakı ilə şəhərdəki Nəsimi parkı ilə Xəzər dənizi arasındakı 1500 kvadratmetr ərazi məişət tullantılarından təmizlənmişdir.
Bölmənin digər xəbərləri
