Beynəlxalq kukla teatrları festivalı çərçivəsində “Mən danışmaq istəyirəm” tamaşasını nümayiş etdirmişdir
Bakı, 13 noyabr (AZƏRTAC). Noyabrın 13-də Azərbaycan Dövlət Gənc Tamaşaçılar Teatrında (ADGTT) “Cırtdan” II Beynəlxalq kukla teatrları festivalı çərçivəsində İsveçrənin “Ginyöl” Marionet Teatrının ifasında “Mən danışmaq istəyirəm” (“Chat away!”) tamaşası nümayiş etdirilmişdir.
AZƏRTAC xəbər verir ki, tamaşa yeniyetmələri diribaş və ayıq olmağa, öz hüquqlarını qorumağa çağırır.
Stefani Lefortun eyni adlı əsəri əsasında rejissor Flip Oşerin səhnələşdirdiyi səhnə əsərində adi, qaradinməz və özünə qapalı bir məktəblinin taleyindən danışılır. Dyuki adlı bu məktəblinin öz düşüncələrini çatdırmaq, fikrini ifadə etmək bacarığı yoxdur. Çünki onun çox əzazil və zalım bir müəllimi vardır. O, daim basqı altındadır.
Lakin o, qız dostu Liçinin köməyi ilə çətinlikləri dəf etməyə özündə güc tapır və cəmiyyətdə özünə düzgün mövqe seçir.
Tamaşada “Ginyöl” Marionet Teatrının aktyoru Pyer-Alen Rolle çıxış etmişdir. Aktyorun ifasını balaca tamaşaçılar alqışlarla qarşılamışlar.
Sonda aktyora festivalda fəal iştirakına görə fəxri diplom təqdim olunmuşdur.
Bölmənin digər xəbərləri
