BEYNƏLXALQ OLİMPİYA KOMİTƏSİ 2018–Cİ İL QIŞ OLİMPİADASININ KEÇİRİLMƏSİNƏ NAMİZƏD ŞƏHƏRLƏRİN ADLARINI AÇIQLAMIŞDIR
Bakı, 17 oktyabr (AZƏRTAC). Beynəlxalq Olimpiya Komitəsi 2018-ci il qış Olimpiya oyunlarının keçirilməsinə namizəd şəhərlərin yekun siyahısını açıqlamışdır.
Qış Olimpiya yarışlarının keçirilməsinə Fransanın Ansi, Almaniyanın Münxen və Koreya Respublikasının Pxençxan şəhərləri namizəddirlər. Bu yaxınlaradək həmin siyahıya Çinin Xarbin şəhəri də daxil idi, lakin bu dəfə qələbə şansının cüzi olduğunu hesab edən 2008-ci il Olimpiadasının ev sahibləri ərizəni geri götürmüşlər.
Pxençxan dalbadal üçüncü dəfədir qış Olimpiya oyunlarının keçirilməsinə ərizə verir. 2010 və 2014-cü illər Olimpiya oyunları uğrunda mübarizədə Kanadanın Vankuver və Rusiyanın Soçi şəhərlərinə uduzan koreyalıların uğur qazanmaq əzmi qırılmamışdır.
Münxen isə həm yay, həm də qış Olimpiya oyunlarını təşkil edən ilk şəhər ola bilər. 1972-ci ildə bu Almaniya şəhəri yay Olimpiya oyunlarını keçirmişdir.
2018-cı il Olimpiadası paytaxtının adı BOK-un 2011-cı ilin iyulunda CAR-ın Durban şəhərində keçiriləcək 123-cü sessiyasında açıqlanacaqdır.
Bölmənin digər xəbərləri
