Beynəlxalq tədbirdə Azərbaycanın ekokönüllüləri Oxçuçayı nümunə göstərərək çayların çirklənməsinin ekoloji problemlərindən bəhs ediblər
Bakı, 11 sentyabr, AZƏRTAC
Həştərxanda keçirilən VI Xəzər Media Forumu çərçivəsində Azərbaycan, Qazaxıstan və Rusiyanın aparıcı ictimai təşkilatlarından ekoloji könüllülərin iştirak etdiyi "Xoşməramlı meridianlar" Xəzər Könüllülük Məktəbi təşkil edilib.
Layihənin təşkilatçıları Rusiyanın "Şimal-Cənub" Politologiya Mərkəzi, Prezident Qrant Fondunun dəstəyi ilə "Xəzər-Avrasiya" Beynəlxalq və İctimai-Siyasi Araşdırmalar Mərkəzidir.
AZƏRTAC xəbər verir ki, Xəzər Könüllülük Məktəbinin toplantısının əsas mövzusu “Bölgənin ekologiyası bir investisiya faktoru olaraq və turistik gəzinti yerləri” olub. Məktəbin iş proqramı ekoloji könüllülük və ekologiya sahəsində medianın könüllülüyünə həsr olunmuş bir sıra tədbirlərdən ibarət olub. "Bu gün Ekokönüllülüklə İşləməkdə Ən Yaxşı Təcrübələr və yanaşmalar" və “Ekologiya sahəsində könüllülük fəaliyyətində əsas maneələrin aradan qaldırılması” panel müzakirələri keçirilib.
Məktəbdə Azərbaycan, Qazaxıstan və Rusiyadan olan könüllülər iştirak ediblər. Xəzər məktəbinin proqramının spikerləri və moderatorları "Bunu et!" könüllü ekoloqların VOO sədrinin müavini İrina Levina və Rusiyanın "ECA" Yaşıl Hərəkatının direktoru Elena Qoroxova olub.
Azərbaycan Respublikasını "EkoSfera" Sosial-Ekoloji Mərkəzinin könüllülərindən ibarət nümayəndə heyəti təmsil edib. "Şimal-Cənub" Politologiya Mərkəzinin icraçı direktoru Anjelika Trapeznikovanın salamlama nitqindən və Həştərxan vilayətinin Gənclərlə İş Agentliyinin rəhbəri Viktor Nurtazinin açılış nitqindən sonra Azərbaycan, Qazaxıstan və Rusiyadan olan iştirakçılar layihələri barədə məlumat vermək imkanı əldə ediblər.
Azərbaycan Respublikası Ekologiya və Təbii Sərvətlər Nazirliyinin Ekoloji maarifləndirmə və ictimaiyyətlə əlaqələr şöbəsinin müdiri Səyyarə Məmmədova "Ekokönüllülər" Azərbaycan hərəkatı və Azərbaycanın Xəzər dənizi sahillərinin mühafizəsi və təmizlənməsi sahəsində həyata keçirdiyi milli layihələr haqqında təqdimatla çıxış edib. "EkoSfera" Sosial-Ekoloji Mərkəzinin könüllülər hərəkatının koordinatoru Jalə İsmayılova mərkəzin hazırda həyata keçirdiyi və gələn il beynəlxalq status alacağı nəzərdə tutulan böyük layihələr - "Yaşıl məktəb və uşaq ekoklublarının Ekoloji Şəbəkəsi", "Təbiət üçün SOS" yay interaktiv məktəbi və "Xəzər Bölgəsi - Transsərhəd su əməkdaşlığı" haqqında təqdimatla çıxış edib.
Xəzəryanı ölkələrin könüllü qruplarının panel müzakirələri zamanı Azərbaycandan olan iştirakçılar su obyektlərinin transsərhəd çirklənməsini, Oxçuçay çayı nümunəsindən istifadə edərək Ermənistan tərəfdən çayın çirklənməsinin ekoloji problemlərini, ağır metal fabriklərindən çıxarılan tullantılar əvvəlcədən işlənmədən çaylara axıdılmasını, Xəzər dənizi hövzəsi ilə əlaqəli ictimaiyyəti məlumatlandırmaq üçün birgə səylərin əhəmiyyətini vurğulayıblar və bu problemi həll etmək üçün çirklənmənin nəticələrini minimuma endirmək haqında danışıblar.
Səfər zamanı Xəzər media forumunun iştirakçılarından ibarət Azərbaycan nümayəndə heyətinin üzvləri Azərbaycanın ümummilli lideri Heydər Əliyevin abidəsi önünə gül dəstələri qoyublar. Mərasimdə Həştərxan vilayətinin Əhalinin Məşğulluğu Agentliyinin rəhbəri Ramiz Əzizov və Regional Beynəlxalq Əlaqələr Agentliyinin rəhbərinin müavini İlya Toropitsin iştirak ediblər. Tədbirdən sonra Xəzər Könüllülük Məktəbinin iştirakçıları Həştərxan sahilində ağac əkiblər.
"EkoSfera" Sosial-Ekoloji Mərkəzindən olan azərbaycanlı könüllülərdən ibarət nümayəndə heyətinin tərkibində - ətraf mühitin məlumatlandırılması və gənclərlə iş sahəsində könüllülük əlaqələndiricisi Jalə İsmayılova, medianın sosial rolu sahəsində könüllü Fidan Mikailzadə, Xəzər dənizinin biomüxtəlifliyinin və Xəzər suitisinin problemlərinin qorunması sahəsində könüllü Nigar Mustafayeva, etnoekoloji turizm və uşaq düşərgələri sahəsində könüllü Təbriz Süleymanlı, bölgənin ekoloji transsərhəd problemləri sahəsində könüllü Abdin Abbasov, sənət layihələri sahəsində könüllü Cavid Dadaşov, elmi könüllülük və tədqiqat, aerokosmik monitorinq sahəsində Cavidan Cəfərzadə olublar.
Qeyd etmək lazımdır ki, 1999-cu ildən respublikada fəaliyyət göstərən VI Xəzər Media Forumunda təmsil olunan "EkoSfera" Sosial-Ekoloji Mərkəzi ictimai qeyri-hökumət təşkilatıdır, ekoloji təhsil, etnoekoloji turizm, Azərbaycanın ətraf mühitinin qorunması və mədəni irsi sahəsində təcrübəsi olan gənc alimləri, müəllimləri, tələbələri və şagirdləri özündə birləşdirir. Fəaliyyəti ərzində uşaq və gənclərlə birlikdə 100-dən çox böyük beynəlxalq ekoloji layihə və 5000-dən çox müxtəlif aksiya və ekoloji tədbirlər həyata keçirib. Təşkilatın rəhbəri Ekologiya üzrə fəlsəfə doktoru, Bakı Dövlət Universitetinin Ekologiya və Torpaqşünaslıq fakültəsinin dosenti, Respublika Uşaq-Gənclər İnkişaf Mərkəzinin direktoru Firuzə Sultanzadədir.
Bölmənin digər xəbərləri
