İQTİSADİYYAT
Birinci rübdə Enerji Məsələlərini Tənzimləmə Agentliyinə 1712 müraciət daxil olub
Bakı, 12 aprel, AZƏRTAC
Yanvar-mart aylarında istehlakçıların hüquqlarının qorunması, abonentlərin elektrik və istilik enerjisi, təbii qazla təchizatı və digər məsələlərlə bağlı Enerji Məsələlərini Tənzimləmə Agentliyinə (AERA) bilavasitə və Energetika Nazirliyindən 1712 müraciət daxil olub.
Agentlikdən AZƏRTAC-a bildirilib ki, rüb ərzində elektrik enerjisi təchizatı ilə bağlı 1091, təbii qaz təchizatı üzrə 341 müraciət vətəndaş müraciəti daxil olub. 22 müraciət istilik təchizatı ilə bağlı olub, 258-i digər məsələləri əhatə edib.
1712 müraciətdən 1082-si agentlik tərəfindən araşdırılaraq cavablandırılıb (9 müraciət müvafiq qaydada baxılması və tədbir görülməsi üçün aidiyyəti qurumlara göndərilib), 3 müraciət Energetika Nazirliyi ilə müştərək icra edilib, 429 müraciət hazırda baxılma prosesindədir, 198 müraciət isə məlumat xarakterli olub. Onlardan 50-si qaldırılan problemlərin həlli ilə bağlı təşəkkür məktubu olub.