BMT-NİN BAŞ KATİBİ KOFİ ANNAN TÜRKİYƏDƏ SƏFƏRDƏDİR
Fevralın 24-də Türkiyə Respublikasının prezidenti Əhməd Necdət Sezər qısamüddətli işgüzar səfərlə Ankaraya gələn Birləşmiş Millətlər Təşkilatının baş katibi Kofi Annanı Çankaya köşkündə qəbul etmişdir.
BMT-nin baş katibi prezident Əhməd Necdət Sezərə Kipr probleminin həlli üçün hazırlanan üçüncü plan haqqında məlumat verdi, bunu adanın həm yunan, həm də türk icmalarının razılıqla qarşılayacaqlarına ümidvar olduğunu bildirdi. Prezident Əhməd Necdət Sezər möhkəm sülhün və əmin-amanlığın bərqərar olması üçün hər iki tərəfin mövqeyinə diqqət yetirilməsinin əhəmiyyətini vurğuladı, Kipr türklərini narahat edən məsələləri BMT-nin baş katibinin nəzərinə çatdırdı.
BMT-nin baş katibi Kofi Annan Türkiyənin Ədalət və İnkişaf Partiyasının sədri Rəcəb Tayyib Ərdoğanla da görüşdü. Görüşdən sonra birgə mətbuat konfransı keçirildi. Kofi Annan və Rəcəb Tayyib Ərdoğan yerli və əcnəbi jurnalistələrin suallarına cavab verərək, Kipr probleminin həlli üçün hazırlanan BMT planı barədə mövqelərini açıqladılar. Baş katib plan haqqında Yunanıstanın rəsmi mövqeyini öyrənmək üçün Ankaradan sonra Afinaya səfər edəcəyini bildirdi. Kipr adasında möhkəm sülh və əmin-amanlıq yaranması üçün aparılan müzakirələrin həlledici mərhələyə qədəm qoyduğunu söylədi.
Fevralın 25-də BMT-nin baş katibi Kofi Annan Türkiyənin baş naziri Abdullah Gül ilə görüşmüşdür.
Bölmənin digər xəbərləri
