BMT-nin rezident-əlaqələndiricisi Azərbaycan Turizm İnstitutunda olmuşdur
Bakı, 11 may (AZƏRTAC). Mayın 11-də BMT-nin Azərbaycan üzrə rezident-əlaqələndiricisi Fikrət Akçura Azərbaycan Turizm İnstitutunda (ATİ) olmuşdur.
ATİ-dən AZƏRTAC-a bildirmişlər ki, institutda keçirilmiş görüşdə bu təhsil ocağının rektoru, tarix elmləri doktoru, professor Cəfər Cəfərov qonağa ATİ-nin beşillik fəaliyyəti, beynəlxalq əlaqələri barədə ətraflı məlumat vermişdir. Rektor BMT-nin İnkişaf Proqramının Mədəniyyət və Turizm Nazirliyi ilə birgə həyata keçirdiyi “Turizmin inkişafı layihəsi” çərçivəsində ATİ-nin nəzdində Tədqiqat və İnkişaf Mərkəzinin yaradıldığını bildirmişdir. Həmçinin bu layihə çərçivəsində institutda 7 minədək kitab və informasiya daşıyıcısı olan, ölkədə turizm üzrə ixtisaslaşmış yeganə kitabxana informasiya mərkəzi və xüsusi təlim otağının fəaliyyət göstərdiyi qonağın diqqətinə çatdırılmışdır.
C.Cəfərov cari ildən ATİ-nin BMT-nin əlaqələndirici qurumu olan “Akademik təsir” proqramının üzvləri sırasına qoşulmasının bu ali təhsil ocağının 10 qlobal prinsipin dəstəklənməsi istiqamətində fəaliyyətinə təkan verəcəyini vurğulamışdır.
BMT-nin Azərbaycan üzrə rezident-əlaqələndiricisi Fikrət Akçura Şərq ölkələrində, eləcə də Pakistan, Özbəkistan və Qazaxıstandakı fəaliyyətini Azərbaycanda da uğurla davam etdirəcəyini bildirmişdir. Fikrət Akçura Azərbaycanda çalışacağı müddətdə bu ali təhsil ocağı ilə sıx əməkdaşlıq edəcəyinə əminliyini vurğulamışdır.
Bölmənin digər xəbərləri
