“Astana Finance Days” çərçivəsində Türk Yaşıl Maliyyə Şurasının toplantısı keçirilir
Astana, 9 sentyabr, AZƏRTAC
“Astana Finance Days 2026” beynəlxalq maliyyə forumu çərçivəsində Astanada Türk Yaşıl Maliyyə Şurasının ikinci illik toplantısı keçirilir.
Tədbirdə Türk Dövlətləri Təşkilatının (TDT) üzv və müşahidəçi ölkələrinin maliyyə tənzimləyicilərinin, iqtisadiyyat və maliyyə qurumlarının, eləcə də fond birjalarının rəhbərləri və nümayəndələri iştirak edirlər.
Toplantının məqsədi TDT ölkələrində yaşıl və dayanıqlı maliyyələşdirmənin inkişafını müzakirə etmək, potensialın artırılması, birgə layihələr portfelinin yaradılması və regional əməkdaşlığın təkmilləşdirilməsi üzrə növbəti addım və təklifləri müəyyənləşdirməkdir.
İkinci toplantının əsas mövzuları sırasında TDT-nin üzv və müşahidəçi dövlətlərində yaşıl maliyyələşdirmənin mövcud vəziyyəti, karbon bazarlarının və təbiət əsaslı həllərin inkişafı, dayanıqlı maliyyələşdirmənin idarə edilməsi, şəriət prinsiplərinə əsaslanan yanaşmalar, həmçinin potensialın artırılması və təlim ehtiyacları yer alır.
Toplantı qapalı formatda keçirilir.
AZƏRTAC “Astana Finance Days 2026” forumunun rəsmi media tərəfdaşıdır.
Bölmənin digər xəbərləri
