BMT-NİN TƏHLÜKƏSİZLİK ŞURASI BAŞ KATİBİN TƏŞƏBBÜSÜNÜ DƏSTƏKLƏMİŞDİR
BMT-nin Təhlükəsizlik Şurası faktları aşkara çıxarmaq üçün Cenindəki Fələstin qaçqınları düşərgəsinə BMT-nin nümayəndə heyətini göndərmək barədə baş katib Kofi Annanın təşəbbüsünü dəstəkləmişdir. BMT TŞ-nin yekdilliklə bəyəndiyi qətnamə baş katibi “Cenində olmuş hadisələr haqqında” Şuranın üzvlərinə məlumat verməyə çağırır. Bununla bərabər, sənəddə Yaxın Şərq regionunda mülki əhalinin təhlükəsizliyinə təminat verilməsinin zəruriliyi barədə müddəa var və beynəlxalq humanitar hüquqa hörmət bəslənməsi tələb edilir.
Qətnamənin səsə qoyulan layihəsi ABŞ-ın BMT-dəki nümayəndə heyəti tərəfindən təqdim olunmuşdur. BMT baş katibinin rəsmi nümayəndəsi jurnalistlərə bildirmişdir ki, cümə günü Kofi Annan ilə İsrailin xarici işlər naziri Şimon Peresin telefon danışığı olmuş və söhbət zamanı İsrail diplomatiyasının başçısı Cenindəki Fələstin qaçqınları düşərgəsində baş vermiş faktların müəyyənləşdirilməsi üçün missiya təyin etmək təklifi irəli sürmüşdür.
İTAR-TASS-ın verdiyi xəbərə görə, Peres bildirmişdir ki, İsrail tərəfi Cenində və ya hər hansı digər yerdə baş vermiş hadisələrin araşdırılması üçün regiona BMT nümayəndələrinin göndərilməsi haqqında baş katibin qərarını ancaq alqışlayacaqdır. Peres baş katibə demişdir ki, İsrail rəhbərliyi BMT-nin nümayəndə heyəti ilə əməkdaşlıq etmək niyyətindədir, lakin bu o demək deyildir ki, israillilər “təhqiqat aparılmasına razılaşacaqlar”.
Bölmənin digər xəbərləri
