BMU-İNHA İDP-nin III məzun buraxılışı olub
Bakı, 8 iyul, AZƏRTAC
Bakı Mühəndislik Universiteti ilə Cənubi Koreyanın İNHA Universiteti arasında icra olunan ikili diplom proqramının (BMU-İNHA İDP) 2025–2026-cı tədris ili üzrə məzunları üçün təntənəli buraxılış mərasimi keçirilib.
Bu barədə AZƏRTAC-a BMU-dan məlumat verilib.
BMU-nun rektoru Yaqub Piriyev “Məzun günü”nü yalnız gənclərin zəhməti və əzmkarlığının bəhrəsi deyil, eyni zamanda, Azərbaycan ilə Koreya arasında təhsil sahəsində uğurla inkişaf edən əməkdaşlığın və gələcəyə hesablanmış ortaq baxışın növbəti mühüm nailiyyəti kimi dəyərləndirib. Rektor vurğulayıb ki, Prezident İlham Əliyevin Sərəncamı ilə təsdiq edilmiş “2019-2023-cü illər üzrə Azərbaycan Respublikasında ali təhsil sisteminin beynəlxalq rəqabətliliyinin artırılması Dövlət Proqramı” ölkədə ali təhsilin keyfiyyətinin yüksəldilməsi, beynəlxalq əməkdaşlığın genişləndirilməsi və yüksəkixtisaslı insan kapitalının formalaşdırılması baxımından strateji əhəmiyyət daşıyır. Dövlət Proqramı çərçivəsində dünyanın aparıcı universitetləri ilə birgə həyata keçirilən beş beynəlxalq ikili diplom proqramından biri BMU tərəfindən icra olunur. Yaqub Piriyev bildirib ki, 2020-ci ildən həyata keçirilən BMU-İNHA İDP-nin icra müddəti Prezident İlham Əliyevin ötən il imzaladığı Sərəncamla 2030-cu ilədək uzadılıb.
Rektor diqqətə çatdırıb ki, 3+1 modeli əsasında icra olunan proqramda hazırda 330 tələbə təhsil alır. Bu il həmin tələbələrdən 113-ü məzun adını qazanır. Bununla da proqram üzrə məzunların ümumi sayı 256 nəfərə çatır. BMU ilə İNHA arasında əməkdaşlığın daha da genişləndirilməsi məqsədilə 2024-cü ildə yeni əməkdaşlıq sənədi imzalanıb. Həmin sənədə əsasən, proqram məzunlarının akademik göstəricilərinə görə ən yüksək nəticə əldə edən 10 faizi İNHA Universitetinin magistratura proqramlarına qəbul olunduqları halda tam təqaüdlə təhsil almaq imkanı qazanırlar. Artıq 10-dan çox proqram məzunu İNHA Universitetində magistratura səviyyəsində təhsilini davam etdirir.
Rektor məzunlara müraciətlə vurğulayıb ki, fərqli akademik mühitdə qazandıqları bilik, bacarıq və beynəlxalq təcrübə ölkənin elmi, texnoloji, iqtisadi və sosial inkişafına mühüm töhfə verəcək. Bildirib ki, yüksəkixtisaslı gənc mühəndislər kimi onların Qarabağ və Şərqi Zəngəzurda həyata keçirilən bərpa-quruculuq işlərində, müasir infrastruktur layihələrinin icrasında, rəqəmsal transformasiya və innovativ inkişaf proseslərində fəal iştirak edəcəklərinə inanır.
Elm və təhsil nazirinin müavini İdris İsayev beynəlxalq ikili diplom proqramını uğurla başa vuran gənclərin qazandıqları bilik və bacarıqların onların gələcək peşə fəaliyyətində mühüm rol oynayacağını bildirib. İdris İsayev ölkə rəhbərliyinin gənclərin keyfiyyətli təhsil almasına, beynəlxalq təhsil imkanlarının genişləndirilməsinə göstərdiyi xüsusi diqqət və qayğı nəticəsində bu gün rəqabətqabiliyyətli mütəxəssislərin formalaşdığını vurğulayıb. Nazir müavini xaricdə ali təhsilin bütün səviyyələri üzrə həyata keçirilən dövlət proqramlarının gənclərin peşəkar inkişafına mühüm töhfə verdiyini qeyd edib, eyni zamanda, Prezidentin müvafiq Sərəncamına uyğun olaraq ikili diplom proqramlarının sayının 8-ə çatdırılacağını deyib. İdris İsayev, həmçinin süni intellekt dövrünün çağırışlarını nəzərə alaraq gənclərə daim öz üzərlərində çalışmağı, bilik və səriştələrini davamlı artırmağı tövsiyə edib.
İNHA Universitetinin Himayəçilər Şurasının sədri Yonqrak Sunq və universitetin rektoru Ço Myeonq Voo BMU-İNHA İDP-ni Azərbaycan ilə Koreya arasında təhsil sahəsində uğurlu əməkdaşlığın nümunəsi kimi qiymətləndiriblər. Onlar proqramın tələbələrin beynəlxalq səviyyədə rəqabətqabiliyyətli mühəndis və IT mütəxəssisi kimi formalaşmasına mühüm töhfə verdiyinə, universitetlərarası əməkdaşlığın daha da genişləndirəcəyinə inandıqlarını vurğulayıblar. Bildiriblər ki, məzunlar iki ölkənin təhsil təcrübəsini mənimsəmiş, beynəlxalq standartlara uyğun hazırlıq keçmiş mütəxəssislər kimi qlobal əmək bazarında mühüm üstünlüklərə malikdirlər. Onlar gəncləri daim öyrənməyə, bilik və bacarıqlarını inkişaf etdirməyə çağırıblar.
Sonra Azərbaycan Respublikasının Koreya Respublikasındakı səfiri Ramin Həsənov çıxış edərək ölkələrimiz arasında münasibətlərin son illərdə bütün istiqamətlərdə, xüsusilə təhsil, elm və innovasiya sahələrində uğurla inkişaf etdiyini deyib. Bildirib ki, insan kapitalının inkişafı istiqamətində Koreya Azərbaycan üçün etibarlı tərəfdaşdır və birgə layihələr əməkdaşlığın daha da möhkəmlənməsinə xidmət edir. Səfir ikili diplom proqramının yalnız yüksəkixtisaslı kadrların hazırlanmasına deyil, eyni zamanda iki ölkə arasında mədəni dialoqun gücləndirilməsinə də mühüm töhfə verdiyini qeyd edib. Ramin Həsənov bildirib ki, ikili diplom proqramının məzunları ölkəmizin sosial-iqtisadi inkişafına, innovativ potensialının gücləndirilməsinə mühüm töhfə verəcək.
Koreya Respublikasının ölkəmizdəki səfiri Kimqu Kanq da məzunları təbrik edərək onların Azərbaycanın Avropa və Asiyanı birləşdirən strateji mövqeyinin, Orta Dəhlizin mühüm logistika mərkəzlərindən biri kimi artan əhəmiyyəti və ölkənin beynəlxalq nüfuzunun yüksəldiyi tarixi bir dövrdə məzun olmalarını böyük fürsət və xoşbəxtlik kimi dəyərləndirib. Səfir BMU-İNHA İDP-ni Azərbaycan ilə Koreya arasında beynəlxalq təhsil əməkdaşlığının uğurlu modeli kimi səciyyələndirərək, proqramın yüksəkixtisaslı kadrların hazırlanmasına və iki ölkə arasında əlaqələrin möhkəmlənməsinə mühüm töhfə verdiyini vurğulayıb.
Tədbirdə çıxış edən məzunlar bildiriblər ki, proqram onlara beynəlxalq səviyyəli təhsil almaqla yanaşı, fərqli akademik və mədəni mühitdə inkişaf etmək, yeni bilik və bacarıqlar əldə etmək, qlobal dünyagörüşü formalaşdırmaq üçün geniş imkanlar yaradıb.
Çıxışlardan sonra ixtisas birinciləri və universitetin ictimai həyatında fəal iştirak edən məzunlar mükafatlandırılıb, bütün məzunlara diplomlar təqdim olunub.
Mərasimin bədii hissəsində tələbələrin ifasında Azərbaycan və Koreyanın milli rəqsləri nümayiş etdirilib, konsert proqramı təqdim olunub.
Bölmənin digər xəbərləri
