BMU tələbəsi “SmarTech-I” müsabiqəsində I yerə layiq görülüb
Bakı, 11 sentyabr, AZƏRTAC
Bakı Mühəndislik Universitetinin (BMU) kimya ixtisası üzrə III kurs tələbəsi Şəhla Məmmədova “SmarTech-I” - “Yaşıl və ağıllı gələcək naminə innovasiyalar müsabiqəsi”nin final mərhələsində I yerə layiq görülüb.
Universitetdən AZƏRTAC-a bildirilib ki, Şəhla Məmmədovanın ekoloji davamlılığın təmin edilməsi və tullantıların azaldılmasına yönəlmiş “VivaLina” startap ideyası münsiflər heyəti tərəfindən yüksək qiymətləndirilib.
Şəxsi gigiyena məhsullarının ətraf mühitə təsirinin azaldılmasını hədəfləyən layihə innovativ və dayanıqlı həll yanaşması ilə seçilib.
Müsabiqə Sumqayıt Dövlət Universitetinin nəzdində Sumqayıt Dövlət Texniki Kollecinin təşkilatçılığı ilə gənclərin innovativ düşüncəsinin, texnoloji bacarıqlarının və davamlı inkişaf sahəsində potensialının dəstəklənməsi məqsədilə keçirilib.
Qeyd olunub ki, BMU Texnoparkının rezidenti olan “VivaLina” startapı müxtəlif təlim və mentorluq proqramlarına qoşularaq inkişaf edib.
Bölmənin digər xəbərləri
