BOKS ÜZRƏ LİSENZİYA TURNİRİ BAKIDA KEÇİRİLƏCƏK
Gənclər, İdman və Turizm Nazirliyində aprelin 27-dən mayın 2-dək Bakı İdman Sarayında keçiriləcək boks üzrə Avropa lisenziya turniri təşkilat komitəsinin iclası olmuşdur. Azərbaycan Boks Federasiyasının prezidenti Ağacan Abiyev bildirmişdir ki, turnirdə 35 ölkədən 100 idmançı 6 çəki dərəcəsində yarışacaqdır. Azərbaycanı 3 idmançı – Ceyhun Əbiyev (48 kq), Ağası Məmmədov (54 kq), Əli İsmayılov (81 kq) təmsil edəcəklər. 69 və 62 kq çəki dərəcələrində boksçularımız artıq olimpiya lisenziyaları qazanmışlar.
Turnirə fəxri qonaqların – Beynəlxalq Həvəskar Boks Federasiyasının prezidenti professor Ənvər Çoudrinin, Avropa Boks Federasiyasının prezidenti Emil Jeçevin gələcəyi gözlənilir.
Bölmənin digər xəbərləri
