Britaniyada İcmalar palatası evtanaziyanın lehinə səs verib
Bakı, 21 iyun, AZƏRTAC
Böyük Britaniyanın İcmalar palatası cümə günü, iyunun 20-də ölkədə bir nəslin həyatında ən böyük sosial dəyişikliyə yol açan evtanaziyanın qanuniləşdirilməsini nəzərdə tutan qanun layihəsinin lehinə səs verib.
AZƏRTAC xəbər verir ki, qanun layihəsinin lehinə 314, əleyhinə isə 291 deputat səs verib.
“Müalicəsi mümkün olmayan xəstə yetkinlər – ömrün sonu ” Qanun layihəsinə əsasən, İngiltərə və Uelsdə yaşı 18 və daha çox olan, altı ay və ya daha az ömrü qalan ruhi cəhətdən sağlamı, fiziki baxımdan ölümcül xəstələr həyatlarını başa çatdırmaq üçün yardım tələb edə və onu ala biləcəklər. Müalicəsi mümkün olmayan xəstəliyə tutulmuş konkret şəxs üçün evtanaziyaya icazə verilməsi barədə qərar iki müstəqil həkim, hüquqşünas, sosial işçi və psixiatrdan ibarət komissiya tərəfindən veriləcək. Xəstə həyatına son qoymaq arzusunu qəti və aydın şəkildə bəyan etməli, qohumları və ya digər insanlar tərəfindən heç bir məcburiyyət olmamalıdır. Bundan əlavə, xəstə ölümə səbəb olan preparatı müstəqil şəkildə qəbul etməlidir.
Qanun layihəsi növbəti mərhələdə Böyük Britaniyanın yuxarı - Lordlar palatasına göndəriləcək və orada aylarla müzakirə ediləcək. Bununla belə, əlavə düzəlişlər də ola bilər.
Sənəd hər iki palata tərəfindən qəbul olunarsa, Böyük Britaniya Avstraliya, Kanada və digər ölkələrə, eləcə də ABŞ-ın bəzi ştatları ilə bərabər evtanaziyanın qanuni olduğu ölkələr sırasında yer alacaq.
Londonda yüzlərlə insan səsvermənin nəticələrini öyrənmək üçün parlament binası qarşısında toplaşıb. Nəticələrin açıqlandığı məqamda qanun layihəsini dəstəkləyən insanlar sevincdən qucaqlaşıb, onu alqışlayıblar. Onlar “qələbə”, “biz qalib gəldik” şüarları səsləndirib, plakatlar qaldırıblar. Qanuna qarşı çıxanlar isə xəbəri susqunluqla qarşılayıblar.
Rəy sorğuları göstərir ki, britaniyalıların əksəriyyəti evtanaziyanı dəstəkləyir.
Bölmənin digər xəbərləri
