BU İL BAKI DÖVLƏT UNİVERSİTETİNİ 4 MİNƏDƏK TƏLƏBƏ BİTİRMİŞDİR
AZƏRTAC xəbər verir ki, iyunun 28-də Bakı Dövlət Universitetində (BDU) 2007-2008-ci tədris ilinin məzunları ilə təntənəli görüş olmuşdur.
BDU-nun rektoru, Milli Məclisin deputatı, akademik Abel Məhərrəmov ümummilli liderimiz, qüdrətli dövlət xadimi Heydər Əliyevin siyasəti nəticəsində ölkəmizdə qazanılan nailiyyətlərdən danışmış, ulu öndərimizin siyasi xəttinin Azərbaycan Prezidenti İlham Əliyev tərəfindən əzmlə davam etdirildiyini vurğulamışdır.
Dahi rəhbərimiz Heydər Əliyevin Bakı Dövlət Universitetinin məzunu olduğunu qürur hissi ilə qeyd edən rektor, bu ali məktəbin şərəfli inkişaf yolu keçdiyini söyləmişdir.
Akademik A. Məhərrəmov universiteti 2007-2008-ci tədris ilində 4 minədək tələbənin bitirdiyini və onların müəyyən hissəsinin fərqlənmə diplomuna layiq görüldüyünü diqqətə çatdırmışdır. Rektor məzunları təbrik edərək, onlara uğurlar arzulamışdır.
Təhsil naziri Misir Mərdanov müdrik dövlət xadimi Heydər Əliyevin gənclərə və təhsilimizə göstərdiyi diqqət və qayğıdan bəhs etmişdir.
Ulu öndərimiz Heydər Əliyevin “Bakı Dövlət Universiteti Azərbaycan xalqının milli sərvətidir” kəlamını xatırladan nazir, BDU-nun elm və təhsilimizin inkişafında mühüm rolunu vurğulamışdır.
Yeni Azərbaycan Partiyası Yasamal rayon təşkilatının sədri Fikrət İsmayılov və digər natiqlər də məzunlara xoş arzularını söyləmiş, onların Vətənimizə, xalqımıza layiqincə xidmət edəcəklərinə əmin olduqlarını bildirmişlər.
Təhsildə yüksək nəticələr əldə etmiş məzunlara diplomlar təqdim olunmuşdur.
Sonra tələbələr və incəsənət ustaları maraqlı konsert proqramı ilə çıxış etmişlər.
######
Bölmənin digər xəbərləri
