CƏMİYYƏT
Bu il “Karyerada ilk addım” devizi altında 29 aktiv məşğulluq tədbiri keçiriləcək
Bakı, 8 fevral, AZƏRTAC
Əmək və Əhalinin Sosial Müdafiəsi Nazirliyi yanında Dövlət Məşğulluq Xidməti tərəfindən bu il Bakı, Sumqayıt, Gəncə, Mingəçevir və Lənkəran şəhərlərində tələbə və məzunlar üçün “Karyerada ilk addım” devizi altında 29 aktiv məşğulluq tədbirinin keçirilməsi nəzərdə tutulur.
Nazirliyin İctimaiyyətlə əlaqələr və kommunikasiya şöbəsindən AZƏRTAC-a verilən məlumata görə, tədbirlər həmin şəhərlərdə olan ümumilikdə 25 universitet və 2 kollecdə keçiriləcək. Həmçinin Gənclər Fondu, “ASAN xidmət” və işəgötürənlərlə əməkdaşlıq həyata keçirilməklə də “Karyerada ilk addım” tədbirləri təşkil ediləcək.
Həmin tədbirlərin keçirilməsi mart ayından başlanacaq. Aktiv məşğulluq tədbirlərində tələbə və məzunlar işəgötürənlərə şəxsi məlumatlarını təqdim edə, işəgötürənlər isə müvafiq ixtisaslar üçün kadr seçimi aparmaq imkanı qazanacaqlar.
Tədbirlər zamanı təcrübə proqramlarında iştirak etmək istəyənlərin qeydiyyatı da aparılacaq, məşğulluq xidmətləri, aktiv məşğulluq tədbirləri barədə iştirakçılara məlumatlar veriləcək.