Bu il Qaxda 13 min 795 ton dən qarğıdalı istehsal olunub
Qax, 26 noyabr, Mustafa Dadaşov, AZƏRTAC
Qax rayonunun təsərrüfatlarında qarğıdalı yığımı başa çatıb. Bu il rayonun torpaq mülkiyyətçiləri 1527 hektar sahədə dən üçün qarğıdalı yetişdiriblər. Qarğıdalı bitkisinin əkin sahəsi əvvəlki illə müqayisədə 74 hektar artırılıb. Cari mövsümdə rayonda 13 min 795 ton dən qarğıdalı istehsal olunub. Hər hektardan orta hesabla 90,3 sentner məhsul götürülüb. Məhsuldarlıq əvvəlki illə müqayisədə 3,4 sentner artıb.
Bu barədə AZƏRTAC-ın bölgə müxbirinə Qax Dövlət Aqrar İnkişaf Mərkəzinin bitkiçilik sektorunun baş məsləhətçisi Ülvi Əzimov məlumat verib.
Qurumun rəsmisi bildirib ki, cari təsərrüfat ilində Qax rayonu üzrə ən yüksək məhsuldarlıq Güllük və Əlibəyli kəndlərinin təsərrüfatlarında qeydə alınıb. Belə ki, bu təsərrüfatlarda hər hektardan orta məhsuldarlıq 98 sentner təşkil edib. Qaşqaçay kəndinin təsərrüfatlarında isə hər hektardan 95 sentner məhsul götürülüb.
Baş məsləhətçinin məlumatına görə, bu il rayonda 320 hektarı yaşıl yem, 385 hektarı dən üçün olmaqla, 705 hektar sahədə təkrar qarğıdalı əkini də aparılıb. Hazırda təkrar əkin sahələrində məhsul yığımı davam edir.
Qeyd edək ki, təkrar qarğıdalı əkininə görə fermerlərə dövlət tərəfindən hər hektara 120 manat subsidiya ödənilir.
Bölmənin digər xəbərləri
