DQİDK-nın sədr müavini: Milli-mənəvi dəyərlərimizin təbliğinə xüsusi önəm veririk
Şəki, 4 iyun, AZƏRTAC
Dini Qurumlarla İş üzrə Dövlət Komitəsi (DQİDK) respublikamızın bütün bölgələrində müxtəlif mövzularda silsilə tədbirlər, regional konfranslar təşkil edir. Şəkidə keçirilən bugünkü regional konfransın mövzusu Heydər Əliyev irsində azərbaycançılıq və milli-mənəvi dəyərlərə həsr olunub. Bu mövzuda konfransın keçirilməsi heç də təsadüfi deyil. Çünki milli-mənəvi dəyərlərimizin, o cümlədən azərbaycançılıq ideologiyasının və Ulu Öndər Heydər Əliyevin irsinin təbliğində, eyni zamanda, dini radikalizmə, zərərli meyillərə, məzhəbçilik və digər mənfi təzahürlərə qarşı mübarizədə belə tədbirlərin səmərəli olduğunu düşünürük.
AZƏRTAC-ın bölgə müxbiri xəbər verir ki, bu fikirləri DQİDK-nın sədr müavini Gündüz İsmayılov Şəkidə keçirilən regional konfransda jurnalistlərə müsahibəsində deyib.
Gündüz İsmayılov qeyd edib ki, konfrans çərçivəsində Dövlət Komitəsinin rəhbərliyi bölgədəki məscidlərə də baş çəkib, mövcud dini durumla tanış olub, din xadimləri ilə görüşlər keçirib. “Bu görüşlərdə məqsəd həm din xadimlərinin fəaliyyətini daha da təkmilləşdirmək, onları təlimatlandırmaq, fəaliyyətlərini təşviq etmək, eyni zamanda, mövcud təcrübələri paylaşmaq, tanınmış ilahiyyatçıların imkanlarından, potensialından istifadə etməkdir”,- deyə sədr müavini əlavə edib.
Müxbir – Mustafa Dadaşov
Bölmənin digər xəbərləri
