REGİONLAR
Bu il Qaxda 801 hektarda təkrar qarğıdalı əkini aparılıb
Qax, 16 noyabr, Mustafa Dadaşov, AZƏRTAC
Taxıl biçini başa çatdıqdan sonra bu il Qax rayonunun təsərrüfatlarında 215 hektarı yaşıl yem, 586 hektarı dən üçün olmaqla, 801 hektar sahədə təkrar qarğıdalı əkini aparılıb.
Qax Dövlət Aqrar İnkişaf Mərkəzindən AZƏRTAC-ın bölgə müxbirinə bildirilib ki, fərdi təsərrüfatlarda yaşıl yem üçün əkilmiş qarğıdalının biçini artıq başa çatıb və torpaq mülkiyyətçiləri sahələrdən 6450 ton yaşıl kütlə əldə ediblər. Dən üçün təkrar qarğıdalı əkilmiş sahələrin 486 hektarında da biçin artıq yekunlaşıb, 2085 ton dən qarğıdalı istehsal olunub. Hər hektardan 42,9 sentner məhsul götürülüb.
Qeyd edək ki, təkrar əkinlər həm aqroekoloji, həm də iqtisadi baxımdan səmərəlidir. Mütəxəssislər hesab edirlər ki, respublikada mal-qaranın qüvvəli və yaşıl yemə olan tələbatını tam təmin etmək üçün təkrar əkinlərdən istifadə vacib sayılır. Ölkə üzrə təkrar əkin sahələrinin hər hektarından 350-400 sentner yaşıl kütlə və ya 40-50 sentner dən məhsulu əldə etmək mümkündür.