Bu il Qəbələdə 99 tona yaxın quru tütün istehsal edilib
Qəbələ, 22 dekabr, Mustafa Dadaşov, AZƏRTAC
Builki mövsümdə Qəbələ rayonunun fermerləri 75 hektar sahədə tütün yetişdiriblər. Əkin sahələrinin 15 hektarına “Virciniya” növlü ətirli, 24 hektarına “Berley”, 36 hektarına isə yerli tütün sortları əkilib. Artıq təsərrüfatlarda tütünün yığımı və qurudulması prosesi tam başa çatıb. Mövsüm ərzində sahələrdən 922 ton yaşıl tütün kütləsi tədarük olunub. Fermerlər yetişdirdikləri tütün sortlarından 98 ton 736 kiloqram quru tütün istehsal ediblər.
Bu barədə AZƏRTAC-ın bölgə müxbirinə Qəbələ Dövlət Aqrar İnkişaf Mərkəzindən məlumat verilib.
Qurumdan bildiriblər ki, istehsal olunan quru tütünün 12 tonu “Virciniya” növlü ətirli, qalanı isə “Berley” və yerli sortlardır. Kampaniya dövründə tütünün əkilib becərilməsi, dərimi və qurudulmasına 120-dək yerli sakin cəlb edilib.
Bölmənin digər xəbərləri
