BUNDAN SONRA İNGİLİS ŞƏRABI VƏ BİTKİ YAĞI BOL OLACAQDIR
AZƏRTAC xəbər verir ki, Uels şahzadəsi Çarlzın anası kraliça II Yelizavetanın ona doğum günü münasbətilə hədiyyə etdiyi “Aston Martin” markalı avtomobili bundan sonra ingilis şərabından hazırlanmış bioetanolla işləyəcəkdir. Şahzadənin mətbuat katibinin dediyinə görə, Çarlz ətraf mühitin mühafizəsi işinə öz töhfəsini bu cür vermək niyyətindədir.
Şahzadənin Klarens-haus rəsmi iqamətgahı nümayəndəsinin dediyinə görə, söhbət şərabın əmtəəlik artıqlarından gedir. Avropa İttifaqının qaydalarına əsasən, şərab məhsulunun artıqları satışa çıxarıla bilməz, buna görə də onlara faydalı tətbiq sahəsi tapmaq lazımdır.
38 yaşı tamam olmuş şahzadə “Aston Martin” avtomobilini, əsasən, yayda sürür. Avtomobilin illik yürüşü təqribən 480 kilometrdir. Şahzadənin “Yaguar”, “Audi” və “Range Rovers” markalı digər avtomobilləri də yüzfaizlik bioyanaçağa keçirilmişdir. Lakin bu yanacaq şərabdan deyil, istifadə edilmiş yağdan hazırlanır.
Şahzadə Çarlz ətraf mühit problemlərinə öz diqqətli münasibəti ilə tanınır və onun gördüyü bütün tədbirlər təsirli nəticələr verir. Məsələn, maliyyə hesabatlarına əsasən şahzadənin səfərləri, habelə onun müəssisələrinin fəaliyyəti nəticəsində atmosferə atılan zərərli tullantıların həcmi 18 faiz azalmişdir.
