Cəsur əsgər Rahib Məmmədovun xatirəsi anılıb
Ağdam, 25 avqust, Tahir Ağaməmmədov, AZƏRTAC
Gürcüstanda baş verən təbii fəlakət zamanı insanları xilas edərkən qəhrəmanlıqla həlak olan Rahib Məmmədovun xatirəsi Azərbaycan və gürcü xalqları tərəfindən daim ehtiramla anılır və yad edilir.
AZƏRTAC-ın bölgə müxbiri xəbər verir ki, Ağdam rayon Rahib Məmmədov adına Döyüş Şöhrəti Muzeyi və Heydər Əliyev Mərkəzinin birgə təşkilatçılığı ilə cəsur azərbaycanlı əsgər Rahib Məmmədovun anım gününə həsr olunmuş onlayn tədbir keçirilib. “ZOOM” proqramı vasitəsilə keçirilən tədbirdə çıxış edənlər cəsur əsgərin mənalı və qəhrəmanlıqla dolu həyatından bəhs ediblər. Məlumat verilib ki, Rahib Gülmalı oğlu Məmmədov 1967-ci ildə Ağdam rayonunun Mahrızlı kəndində anadan olub. 1987-ci ildə hərbi xidmət keçdiyi Gürcüstanın Xobi rayonunun Çaladidi kəndində böyük fədakarlıq göstərərək, təbii fəlakət zamanı 28 sakini seldən xilas edib və qəhrəmanlıqla həlak olub. Ölümündən sonra “Qırmızı Ulduz” ordeni ilə təltif olunub. Təhsil aldığı Mahrızlı kənd tam orta məktəbi onun adını daşıyır. Məktəbin həyətində Rahib Məmmədov adına Döyüş Şöhrəti Muzeyi yaradılıb. Bakının Xətai rayonunun Əhmədli yaşayış massivində Rahib Məmmədov adına küçə var. Gürcüstanın Çaladidi kəndində cəsur əsgərin abidəsi qoyulub.
Rahib Məmmədovun anım günü münasibətilə onun adını daşıyan muzeyin kollektivi qəhrəmanın büstü önünə gül dəstələri qoyaraq, xatirəsini yad edib. Sonra Bakı Binə Peşə Liseyinin müəllimi Tamam Rəhimovanın göndərdiyi Rahib Məmmədovun rəngli boya ilə çəkilmiş portretinin təqdimatı olub.
Bölmənin digər xəbərləri
