Çexiyada irqçilik zəminində qalmaqal qızışıb
Praqa, 23 may, AZƏRTAC
Vətəndaş Demokratik Partiyasının sədri Petr Fiala Nimburk vilayət partiya şurasının üzvü Rene Franeki sosial şəbəkədə Britaniya şahzadəsi Harri ilə amerikalı aktrisa Meqan Marklın toyunun şərhində siyasi ədəbsizliyə yol verdiyinə görə üzr istəməyə çağırıb. Vətəndaş demokratların sədrinin fikrincə, əgər Rene Franek üzr istəməkdən imtina edərsə, partiyanın sıralarında qala bilməz. “Cənab Franekin irqçilik haqqında söylədikləri qəbuledilməzdir. Onun baxışları bizim dəyərlərimizə uyğun deyil”, - deyə Fiala qeyd edib.
AZƏRTAC xəbər verir ki, Vətəndaş Demokratik Partiyasının üzvü Rene Franek sosial şəbəkədə “Prezident Zeman Vindzorda keçirilən toya niyə dəvət olunmayıb” sualına “Əgər vəliəhd qaraçı qızla evlənirsə, Prezidentin orada nə işi var?” cavabını verib. O, təəssüratları yumşaltmağa çalışaraq, “ictimai əks-səda yaradan multikultural zənginləşməni” nəzərdə tutduğunu deyib.
Pərvanə Qarayeva
AZƏRTAC-ın xüsusi müxbiri
Praqa
Bölmənin digər xəbərləri
