Çin “Change 8” missiyası çərçivəsində Aya beynəlxalq kosmik gəmilər göndərməyə hazırdır
Bakı, 4 oktyabr, AZƏRTAC
Çin digər dövlətlərin və beynəlxalq təşkilatların “Change 8” kosmik proqramında iştirakını alqışlayır və öz kosmik gəmilərini Ayın səthinə çatdırmağa hazırdır.
AZƏRTAC xəbər verir ki, bunu Bakıda keçirilən 74-cü Beynəlxalq Astronavtika Konqresində (IAC-2023) çıxış edən Çin Milli Kosmik Administrasiyasının (CNSA) Ay Tədqiqatları Proqramı Mərkəzinin mütəxəssisi Vanq Qionq deyib.
“Beynəlxalq ictimaiyyətlə əməkdaşlıq imkanları açıqdır. Biz beynəlxalq tərəfdaşları birgə əməliyyatlar aparmağa dəvət edirik”, - o bildirib.
ÇXR missiyası digər ölkələrdən kosmik gəmiləri Aya çatdıra biləcək və burada onlar çinli həmkarları ilə müxtəlif səviyyələrdə qarşılıqlı əlaqədə öz tədqiqatlarını davam etdirə biləcəklər. Beləliklə, missiya səviyyəsində fəaliyyətlər zamanı Çin və beynəlxalq ictimaiyyətin nümayəndələri bir-biri ilə qarşılıqlı əlaqədə olan öz yerüstü nəqliyyat vasitələri ilə Ayın səthini birgə tədqiq edə biləcəklər.
Daha əvvəl “Space: Science & Technology” elmi jurnalında dərc olunan məqalədə Çin Elmlər Akademiyasının Kosmik Elm Mərkəzinin və CNSA Ayın Kəşfiyyat Proqramının mühəndislik mərkəzinin mütəxəssisləri 2024-cü ildə Ayın uzaq qütbündən torpaq nümunələri toplamaq üçün “Change 6” aparatının orbitə buraxılacağını bildirmişdilər. “Change 7” kosmik gəmisinin isə 2026-cı ildə cənub qütb zonasına enməsi planlaşdırılır.
“Change 8” Beynəlxalq Ay Tədqiqat Stansiyasının əsas modelini yaratmaq üçün təxminən 2028-ci ildə buraxılacaq.
Bölmənin digər xəbərləri
