DÜNYA
ÇİN: TƏBİİ FƏLAKƏT 1,4 MİLYONDAN ÇOX İNSANIN NORMAL HƏYATINI POZMUŞDUR
Neçə gündür ara verməyən leysan yağışlari nəticəsində Çinin Xunan əyalətinin 10 qəzasında 148 şəhər tipli qəsəbə su altında qalmışdır. Təbii fəlakət 1,4 milyondan artıq insanın normal həyat şəraitini pozmuş, 8 min yaşayış evini dağıtmış, bir sıra su anbarlarına və çay bəndlərinə zərər vurmuşdur.
Mütəxəssislər bildirir ki, Syantszyan, Szışuy və Lişuy çaylarında, habelə Duntin gölündə suyun səviyyəsi xeyli qalxmışdır. Məsələn, Syantszyan çayında suyun səviyyəsi 3,6 metrdən artıq olmuşdur. Leysan yağışları Çinin Şərqindəki Futszyan əyalətində də ara vermir. Güclü sürüşmə nəticəsində əyalətin şimal hissəsində qatarların hərəkəti dayanmışdır.
ÇXR Dövlət Şurası sədrinin müavini Ven Szyabao yerli hakimiyyət dairələrini daşqına qarşı mübarizədə səmərəli tədbirlər görməyə, təbii fəlakətdən vura biləcəyi zərəri minimuma endirmək üçün səy göstərməyə çağırmışdır.
İTAR-TASS-ın verdiyi xəbərə görə, ÇXR-in bir sıra cənub-qərb, şimal-şərq və cənub əyalətləri də güclü yağışlardan və daşqınlardan xeyli ziyan çəkmişdir.