ÇİNDƏ ÜMUMMİLLİ LİDER HEYDƏR ƏLİYEVİN XATİRƏSİ YAD EDİLMİŞDİR
Mərasimdə ÇXR-də akkreditə olunmuş bir sıra xarici ölkələrin diplomatik nümayəndəliklərinin rəhbərləri və əməkdaşları, Azərbaycan səfirliyinin işçiləri, Pekində təhsil alan azərbaycanlı tələbələr, Çində müvəqqəti olaraq fəaliyyət göstərən azərbaycanlı iş adamları iştirak etmişlər. Tədbirə, həmçinin Çində işgüzar səfərdə olan Moldovanın sabiq Prezidenti P.Luçinski də qatılmışdır.
Bir dəqiqəlik sükutdan sonra Azərbaycanın Çindəki səfiri Yaşar Əliyev mərasim iştirakçılarını salamlayaraq, dövlətimizin müasir tarixindən söhbət açmış, dövlətçiliyimizin qorunması yolunda ümummilli liderimiz Heydər Əliyevin misilsiz xidmətlərindən danışmış, ulu öndərin müstəqilliyimizin möhkəmləndirilməsi prosesində gördüyü işlər barədə ətraflı məlumat vermişdir.
Daha sonra Heydər Əliyevə həsr olunmuş “Böyük ömrün anları” adlı sənədli film nümayiş etdirilmişdir.
Filmə baxdıqdan sonra Türkiyənin Çindəki səfiri O.Özüye türk dünyasının dahi oğlu Heydər Əliyevin regionun ölkələrinin inkişafına verdiyi töhfələri xüsusi qeyd etmişdir. Ukraynanın və Gürcüstanın Çindəki səfirləri S.Kamışev və M.Ukleba ümummilli liderimizin xalqlararası dostluğun möhkəmlənməsi istiqamətində gördüyü misilsiz işlərdən söhbət açmışlar. Moldovanın sabiq Prezidenti P.Luçinski Heydər Əliyevlə görüşlərindən söhbət açaraq, xatirələrini mərasim iştirakçıları ilə bölüşmüşdür.
Bölmənin digər xəbərləri
