Çində Yaz festivalında dəmir yolu ilə 410 milyondan çox sərnişin daşınacaq
Pekin, 22 dekabr, AZƏRTAC
Çində Ay təqvimi ilə qeyd olunan Yeni il bayramı və ya Yaz festivalı dövründə dəmir yolu ilə 410 milyondan çox sərnişinin daşınacağı gözlənilir.
AZƏRTAC Çin Dəmir Yolları Korporasiyasının məlumatına istinadla xəbər verir ki, Çində ən əsas bayramlardan biri və bəlkə də birincisi olan Yaz festivalı günlərində turizm və yaxın qohumlara baş çəkmək məqsədi ilə xeyli səfər qeydə alınır. Yanvarın 21-dən martın 1-dək davam edəcək növbəti festival günlərində dəmir yolu nəqliyyatı ilə ötən ilki göstəricidən 8,3 faiz çox sərnişinin daşınması gözlənilir. Gündəlik sərnişin daşınmasında da yeni rekordun qeydə alınacağı güman olunur. Artıq dekabrın 23-dən Yaz bayramı dövrü üçün bilet satışına başlanılacaq.
Qeyd edək ki, Ay təqvimi ilə yeni il fevralın 5-də başlayacaq.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
