CİNAYƏTKAR DƏSTƏNİN İFŞA OLUNMASI ÜÇÜN ZƏRURİ ƏMƏLİYYAT-AXTARIŞ TƏDBİRLƏRİ GÖRÜLÜR
Daxili İşlər Nazirliyi əhalinin nəzərinə çatdırır ki, naməlum cinayətkar dəstə tərəfindən dələduzluq məqsədi ilə istifadə üçün guya “Dövlət Polis Nəzarət Komitəsi” adlı qurumun yaradılması barədə Azərbaycan Respublikası Prezidentinin imzasına oxşadılmaqla hazırlanmış saxta sərəncam və digər belə sənədlər aşkar edilmişdir.
Nazirlikdən dekabrın 18-də AZƏRTAC-a daxil olmuş məlumatda bildirilir ki, keçirilmiş əməliyyat tədbirləri nəticəsində bəlli olmuşdur ki, hələlik şəxsiyyətləri müəyyən edilməmiş bu cinayətkar dəstənin üzvləri, onlara guya yoxlama aparmaq hüququ verən saxta sənədlərdən istifadə etməklə, ayrı-ayrı nazirliklərdən, digər dövlət strukturlarından və iş adamlarından aldatma yolu ilə pul qoparmağa cəhdlər göstərirlər.
Bununla əlaqədar vətəndaşlardan xahiş olunur ki, qondarma “Dövlət Polis Nəzarəti Komitəsi” adından fəaliyyət göstərən cinayətkar dəstənin üzvlərinin şəxsiyyəti, qanunsuz əməlləri, habelə onların dələduzluq hərəkətlərinə məruz qalmaları ilə bağlı məlumatları dərhal aşağıdakı telefonlarla Daxili İşlər Nazirliyinə bildirsinlər:
96-39-10; 96-39-20; 90-98-58; 92-73-96; 90-92-85
Daxili İşlər Nazirliyinin müvafiq xidmətləri cinayətkar dəstənin ifşa olunması üçün zəruri əməliyyat-axtarış tədbirlərini davam etdirir.
Bölmənin digər xəbərləri
