CONATAN HENİK: AZƏRBAYCANLA ABŞ ARASINDA ƏLAQƏLƏR SON İLLƏR YENİ MƏRHƏLƏYƏ YÜKSƏLMİŞDİR

25.06.2008 [22:33]
Çap et
A⁺ A^-

İyunun 25-də Azərbaycan İngilis Dili Müəllimləri (AzETA) Assosiasiyası “Aqua Park”da ABŞ səfirliyinin ictimaiyyətlə əlaqələr şöbəsinin rəisi Conatan Henik və ABŞ Təhsil Şurasının (“ACCELS”) Azərbaycan nümayəndəliyinin rəhbəri Şeyn Ostinin ölkəmizdə fəaliyyətinin yekununa həsr olunmuş mərasim keçirmişdir. Tədbirdə ABŞ-ın Azərbaycanda müxtəlif layihələr həyata keçirdiyi vurğulanmışdır. Qeyd edilmişdir ki, AzETA ilə sıx əməkdaşlıq isə Azərbaycanda ingilis dilinin tədrisi, yeni kadrların hazırlanması sahəsində bir sıra irəliləyişlər əldə olunmasına gətirib çıxarmışdır.

AZƏRTAC-ın müxbirinə müsahibəsində Conatan Henik Azərbaycanla ABŞ arasında əlaqələrin son illər keyfiyyətcə yeni mərhələyə yüksəldiyini söyləmişdir. O, Azərbaycanda işləməkdən böyük qürur duyduğunu bildirərək, ölkəmizdəki 3 illik fəaliyyətinin uğurlu olduğunu qeyd etmişdir.

Demişdir ki, Azərbaycanla ABŞ arasında təhlükəsizlik, enerji, demokratik islahatlar sahəsində sıx əməkdaşlıq qurulmuşdur. Təhsil, xüsusilə ingilis dili proqramlarının həyata keçirilməsi sahəsində Azərbaycanda geniş imkanlar var. ABŞ Prezident İlham Əliyevin Azərbaycanın Qərbə inteqrasiya siyasətini hər zaman dəstəkləmişdir.

Tədbirdə ABŞ səfilriyinin ictimaiyyətlə əlaqələr şöbəsinin yeni müdiri Terri Davidson da iştirak edirdi.