COP29: Azərbaycanın qlobal iqlim siyasətindəki strateji rolu və yeni perspektivlər
Bakı, 15 noyabr, AZƏRTAC
Bir sıra beynəlxalq tədbirlərə uğurla ev sahibliyi edən Azərbaycan COP29-da da öz sözünü deməyi bacarır. Dünya liderlərindən tutmuş sadə vətəndaşlaradək hamı bu mötəbər tədbirə böyük sevgi ilə qatılır. Yerli və xarici medianın da gündəmini dəyişən COP29 qüsursuzluğu ilə diqqəti cəlb edir. Yetmiş mindən çox insanın iştirak etdiyi tədbirin 3618 nəfəri media mənsubudur. İştirakçıların böyük qismini isə beynəlxalq müşahidəçilər təşkil edir. Onların sayı 13 min 275 nəfərdir. 196 ölkədən təşrif buyuran qonaqlar COP29-un gündəliyini zəbt edən mövzularla yanaşı, ölkəmizin zəngin tarixi, mədəniyyəti mətbəxi barədə də dərin biliklərə sahib olur.
Bu fikirləri AZƏRTAC-a müsahibəsində beynəlxalq dərəcəli təlimçi, şəxsi inkişaf üzrə kouç İlahə Adil söyləyib.
COP29-da iştirak edən dünya liderlərinin maraqlı mesajları ilə diqqət çəkdiyini vurğulayan İ.Adil deyib: “Noyabrın 12-də Bakıda BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29) Liderlər Sammitinin açılış mərasimində çıxış edən Prezident İlham Əliyev bildirdi ki, Azərbaycan Şimal ilə Cənub, Qərb ilə Şərqin qovuşduğu ölkədir və bu, təkcə coğrafiya ilə bağlı deyil. Biz müxtəlif beynəlxalq iştirakçılar arasında siyasi, mədəni, enerji, ticari və nəqliyyat körpülərini sala bilərik. Azərbaycanın başladığı meqalayihələr artıq Avrasiyanın enerji və daşımalar yollarını dəyişib və məhsuldar, çoxtərəfli əməkdaşlıq formatının qurulması ilə nəticələnib”. Bəli, ölkəmiz Prezident İlham Əliyevin qətiyyətli və uzaqgörən siyasəti nəticəsində günbəgün inkişaf edir və xalqımız məğrur xalq kimi bütün dünyada tanınır.
Beynəlxalq dərəcəli təlimçi vurğulayıb ki, COP qlobal iqlim siyasətində böyük əhəmiyyət daşıyan və dünyanın ən nüfuzlu dövlətlərini bir araya gətirən tədbirdir. Hər il təşkil olunan bu konfransın məqsədi iqlim dəyişikliyi ilə mübarizəni gücləndirmək, xüsusilə də Paris Sazişi çərçivəsində karbon emissiyalarını azaltmaq və planetin gələcəyini qorumaqdır. Azərbaycan beynəlxalq səviyyədə bir çox mühüm tədbirlərə ev sahibliyi etmişdir və COP29 bu tədbirlərin ən böyüyü, ən önəmlilərindən biri kimi tarixə həkk olunacaq. Prezident İlham Əliyevin vurğuladığı kimi, bu tədbir Azərbaycanın qlobal miqyasda iqlim siyasətindəki rolunu və beynəlxalq nüfuzunu daha da artıracaq. Bu formatda böyük beynəlxalq tədbir Azərbaycanın beynəlxalq arenadakı mövqeyini gücləndirməklə yanaşı, ölkəmizə yeni əlaqələr və tərəfdaşlıqlar qurmaq, həmçinin qlobal iqlim siyasətində söz sahibi olmaq üçün əhəmiyyətli imkanlar yaradır.
İqlim dəyişikliyi ilə mübarizədə Azərbaycanın siyasi addımları
İlahə Adil qeyd edib ki, COP29 Azərbaycanın qlobal iqlim siyasətindəki strateji əhəmiyyətini və öhdəliklərini daha da genişləndirmək baxımından mühüm mərhələdir. Tədbir zamanı Azərbaycan iqlim dəyişikliyinə qarşı mübarizə sahəsində daha fəal iştirakını nümayiş etdirərək, dünya ölkələri ilə yeni təşəbbüslər barədə müzakirələr aparır. Eyni zamanda, Azərbaycan xüsusilə təmiz enerji, karbonun azaldılması, dayanıqlı iqtisadiyyatın qurulması və bərpaolunan enerji sahələrində yeni layihələr təqdim edəcək.
Bu cür beynəlxalq müzakirələr Azərbaycanın ekoloji siyasətini inkişaf etdirmək, enerji sektorunda yeni modernləşmə təşəbbüslərini irəli sürmək və bərpaolunan enerji sahəsindəki potensialını ortaya qoymaq üçün mühüm imkandır.
Yeni beynəlxalq tərəfdaşlıqlar və Azərbaycanın strateji yüksəlişi
Beynəlxalq dərəcəli təlimçi bildirib ki, Azərbaycan, inkişaf etməkdə olan ölkələr üçün iqlim maliyyəsi və texnoloji dəstək sahəsində yeni təşəbbüslər irəli sürməklə həm regionda, həm də daha geniş miqyasda iqlim dəyişikliyi ilə mübarizənin sürətləndirilməsinə dəstək verəcək. Bu, həmçinin Azərbaycanın digər inkişaf etməkdə olan ölkələrə göstərdiyi dəstəyin və əməkdaşlığın da göstəricisidir.
Gələcəyə doğru: Yeni perspektivlər və imkanlar
O, eyni zamanda qeyd edib: “COP29-un Azərbaycanda keçirilməsi yalnız ölkənin ekoloji siyasətinin inkişafına xidmət etməyəcək, həm də yeni beynəlxalq perspektivlər və əməkdaşlıq imkanları yaradacaq. Bu tədbir Azərbaycanın dayanıqlı gələcəyini təmin etmək və qlobal miqyasda ekoloji problemlərin həllinə töhfə vermək üçün yeni təşəbbüslər, razılaşmalar əldə etməsi baxımından mühüm mərhələdir”.
Bölmənin digər xəbərləri
