COP29 ekoloji problemlərin həlli və yaşıl dünya naminə həmrəyliyə qlobal çağırışdır ŞƏRH
Bakı, 19 noyabr, AZƏRTAC
Birləşmiş Millətlər Təşkilatının (BMT) İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının – COP29-un Azərbaycanda keçirilməsi qürurverici hadisədir, ölkəmizin növbəti tarixi nailiyyətidir. Konfransda dünyanın 196 ölkəsindən 72 min nümayəndə iştirak edir. Bu, dünyada ikinci ən böyük ali təsisat olan Qoşulmama Hərəkatına sədrliyimiz və BMT Təhlükəsizlik Şurasına qeyri-daimi üzvlüyümüz və sədrliyimizdən sonra xarici siyasətimizin ən böyük uğuru hesab edilə bilər.
Bu fikirləri AZƏRTAC-a açıqlamasında Bakı Dövlət Universitetinin professoru Aydın Kazımzadə söyləyib.
Alim bildirib ki, sözügedən beynəlxalq konfransın Bakıda keçirilməsi qərarı və Prezident İlham Əliyev tərəfindən 2024-cü ilin Azərbaycanda “Yaşıl dünya naminə həmrəylik ili” elan edilməsi heç də təsadüfi deyil. Uzun illərdir ki, Azərbaycan ətraf mühitin mühafizəsinə və iqlim dəyişmələrinin fəsadlarının aradan qaldırılması məsələlərinə xüsusi önəm verir, bu istiqamətdə mühüm işlər görür və bu fəaliyyət beynəlxalq ictimaiyyət tərəfindən yüksək qiymətləndirilir.
Professor Aydın Kazımzadə qeyd edib ki, ölkəmizdə ekoloji siyasətin əsası Azərbaycan xalqının Ümummilli Lideri Heydər Əliyev tərəfindən qoyulub. Ulu Öndər Heydər Əliyev bütün həyatı boyu çoxşaxəli fəaliyyətinin bir istiqaməti kimi təbiətin mühafizəsini, Azərbaycanın bioloji müxtəlifliyinin qorunmasını, ekoloji problemlərinin həllini, unikal təbiət abidələrinin qorunmasını daim diqqət mərkəzində saxlayıb, ekoloji vəziyyətin yaxşılaşdırılması, ətraf mühitin mühafizəsi, təbii sərvətlərdən səmərəli istifadə məsələlərinə xüsusi qayğı ilə yanaşıb. Ulu Öndər həmişə deyirdi ki, “təbiətin ölkəmizə bəxş etdiyi zəngin sərvətlərə xüsusi qayğı ilə yanaşmaq, belə misilsiz xəzinələri bəşəriyyətin gələcəyi naminə qorumaq üzərimizə düşən başlıca vəzifələrdəndir”.
Hələ sovet dönəmində Heydər Əliyevin rəhbərliyi ilə qəbul edilmiş ekoloji qərarlar, qanunlar, sərəncamlar ölkəmizin təbiətinin sağlamlığına yönəlmişdi. 1993-cü ildə xalqın təkidli tələbi ilə hakimiyyətə qayıdışından sonra Heydər Əliyev təbiətin qorunmasını və Azərbaycan Respublikasının ekoloji problemlərini bir daha ön plana çəkib, bu sahədə mövcud olan çatışmazlıqlara xüsusi diqqət ayırıb. Bir sıra qanunvericilik sənədləri yenidən işlənərək təkmilləşdirilib və qəbul edilib. Ölkəmiz beynəlxalq konvensiyalara qoşulub.
Ulu Öndərin ətraf mühitin qorunması, təbii sərvətlərdən səmərəli istifadə siyasəti Prezident İlham Əliyevin rəhbərliyi ilə uğurla davam etdirilir. Bu sahədə həyata keçirilən ardıcıl tədbirlər, görülən işlər ekologiya və ətraf mühitin mühafizəsi istiqamətində yeni uğurların əldə olunmasına təkan verib.
Azərbaycanın 2030-cu ilə qədər sosial-iqtisadi inkişafına dair beş milli prioritetindən biri kimi müəyyən edilmiş “Təmiz ətraf mühit və “yaşıl artım” ölkəsi” prioritetinə uyğun olaraq, ətraf mühitin qorunması və sağlamlaşdırılması, yaşıllıqların bərpası, su ehtiyatlarından və bərpaolunan enerji mənbələrindən səmərəli istifadənin təmin edilməsi və biomüxtəlifliyin qorunub saxlanılması istiqamətlərində intensiv işlər görülür. Otuz ilə yaxın müddətdə ekoloji terrora, ekosid və urbisidə məruz qalmış və 44 gün davam edən Vətən müharibəsi nəticəsində işğaldan azad edilmiş ərazilərimizdə ekosistemin bərpası istiqamətində genişmiqyaslı tədbirlər həyata keçirilir.
“Şübhəsiz ki, 2024-cü ilin “Yaşıl dünya naminə həmrəylik ili” elan edilməsi də ölkəmizdə yaşıl iqtisadiyyatın, yaşıl enerjinin, yaşıl texnologiyaların tətbiqinə, geniş mənada yaşıl artıma hesablanmış strateji addımdır. BMT-nin İqlim Dəyişmələri üzrə Çərçivə Konvensiyasına tərəf olmaqla ölkəmiz qlobal iqlim dəyişmələrinə qarşı mübarizəyə qoşulub, sağlam gələcək, yaşıl dünya naminə daim lazımi tədbirlər görür, bu istiqamətdə üzərinə düşən öhdəlikləri və vəzifələri layiqincə yerinə yetirir, 2030-cu ilə qədər istixana qazlarının miqdarının 35 faiz, 2050-ci ilə qədər isə bu miqdarın 40 faiz azaldılmasını planlaşdırır.
Bu gün dünyanı narahat edən ətraf mühit, qlobal istiləşmə, havanın təmizliyi ilə bağlı bir sıra məsələlər yalnız bir ölkənin deyil, ümumilikdə Yer kürəsindəki bütün dövlətlərin problemidir. Eyni zamanda, ekoloji problemlərin həlli bu sahədə insanların maarifləndirilməsini və bu prosesdə cəmiyyətin bütün üzvlərinin iştirakını tələb edir. Bu baxımdan hesab edirik ki, COP29 bütün ölkələr və cəmiyyətlər üçün ekoloji problemlərin həlli və yaşıl dünya naminə həmrəyliyə qlobal çağırışdır.
İnanırıq ki, bu çağırış, o cümlədən konfransda müzakirə edilən məsələlər və qəbul edilən qərarlar təmiz ətraf mühit və yaşıl artımın təmin edilməsi istiqamətində daha böyük uğurların əldə edilməsi və qlobal baxımdan bütün dünya dövlətləri üçün COP29-dan faydalanmaq imkanı yaradacaq”, - deyə professor Aydın Kazımzadə qeyd edib.
Bölmənin digər xəbərləri
