Cüdo üzrə klublararası Azərbaycan Kuboku yarışlarının seçmə mərhələsinin ikinci dövrəsinin görüşləri keçirilmişdir[YENİLƏNİB]
Bakı, 11 mart AZƏRTAC). Martın 11-də Bakı İdman Sarayında cüdo üzrə klublararası Azərbaycan Kuboku yarışlarının seçmə mərhələsinin ikinci dövrəsinin görüşləri keçirilmişdir.
AZƏRTAC xəbər verir ki, yarışda Azərbaycanın cüdo klublarından - “Kanokan TT”, “İmprotex”, “Sərhədçi”, “Atilla”, “Lokomotiv, “Qəbələ”, “Judo 2012” və “Neftçi” iştirak etmişlər.
On çəki dərəcəsi üzrə keçirilən yarışda hər komanda maksimal 10 idmançı (hər çəkidə 1 nəfər olmaqla - 3 nəfər gənc və 7 nəfər böyük) ilə mübarizə aparmışdır.
İlk olaraq tatami üzərinə “Neftçi” və “Kanokan TT” komandaları çıxmışlar. Görüş “Neftçi”nin üstünlüyü şəraitində keçmiş və komanda 8:2 hesabı ilə qalib gəlmişdir.
Yarışda növbəti görüş “Sərhədçi” və “Qəbələ” komandaları arasında keçirilmişdir. Görüş “Sərhədçi” komandasının 6:4 hesablı qələbəsi ilə yekunlaşmışdır. “Sərhədçi”nin heyətində London Olimpiadasının iştirakçıları Rüstəm Orucov (73 kq) və Elmar Qasımov (100 kq) mübarizə aparmış və qələbə qazanmışlar.
Daha sonra “Atilla” və “Lokomotiv” cüdoçuları tatami üzərinə çıxmışlar. Görüş “Atilla” kollektivinin 6:4 hesablı qələbəsi ilə başa çatmışdır. “İmprotex”-“Judo 2012” qarşılaşmasında heç-heçə qeydə alınmışdır. Ancaq əlavə göstəricilərə görə, “İmprotex” qalib elan olunmuşdur.
Bölmənin digər xəbərləri
