Dağ Yəhudiləri İcmasının sədri: Azərbaycan tolerantlıq və mədəni müxtəlifliyin nümunəsidir
Bakı, 21 may, AZƏRTAC
Ulu Öndər Heydər Əliyev qeyd edirdi ki, tolerantlıq xalqın yüksək mədəniyyətinin təzahürüdür. Bu baxış bucağından yanaşdıqda aydın olur ki, Azərbaycanın zəngin mədəni irsi və çoxəsrlik tarixi bu torpaqda müxtəlif xalqların sülh və qarşılıqlı hörmət şəraitində yaşamasına imkan yaradıb. Bu gün də Azərbaycanda yaşayan bütün etnoslar öz milli adət-ənənələrini, dilini və folklorunu qoruyub saxlayır, onu inkişaf etdirərək ümummilli mədəniyyətin ayrılmaz hissəsinə çevirirlər.
AZƏRTAC xəbər verir ki, bu fikirləri Dağ Yəhudiləri İcmasının sədri Milix Yevdayev folklor tədqiqatçısı Fərbiyə Şabanovanın 85 illik yubileyinə və onun yaradıcısı olduğu “Əvəsor” folklor qrupunun 60 illik fəaliyyətinə həsr edilən “Talış folkloru konserti”ndə çıxışı zamanı səsləndirib.
Onun sözlərinə görə, tarixini yaşadan, dünənini unutmayan və keçmişindən nəticə çıxaran xalqlar gələcəyə inamla və qürurla baxa bilirlər. “Azərbaycan xalqı və bu ölkədə yaşayan bütün milli azlıqlar məhz bu iradəyə və potensiala sahibdirlər. Bu həm də bizim multikultural və tolerant cəmiyyətimizin əsas sütunlarını təşkil edir. Bərabərlik və qarşılıqlı hörmətin hökm sürdüyü cəmiyyətlərdə parçalanma üçün zəmin yaranmır. Əksinə, orada ahəng, birlik və sosial həmrəylik mövcud olur. Azərbaycan xalqı tarix boyu və bu gün də birliyə, vəhdətə və qarşılıqlı hörmətə əsaslanan bir həyat tərzi nümayiş etdirir. Bu gün keçirilən təntənəli tədbir yalnız bir mədəni təqdimat deyil, həm də gələcək nəsillər üçün mühüm bir mesaj, nümunə və ibrət dərsidir. Burada nümayiş olunan dəyərlər ölkəmizdə çoxmədəniyyətli cəmiyyət modelinin uğurla fəaliyyət göstərdiyini bir daha sübut edir. Azərbaycan dünyada nadir ölkələrdəndir ki, dini və etnik müxtəlifliyi özündə harmonik şəkildə birləşdirərək qoruyub saxlamağı bacarıb. Bu model - Azərbaycanın tolerantlıq modeli bir harmoniya nümunəsi kimi beynəlxalq aləmdə də nüfuz qazanıb. Bu gün keçirilən tədbir isə həmin harmoniyanın canlı və parlaq təzahürüdür”, - deyə o vurğulayıb.
Bölmənin digər xəbərləri
