DAŞINMAZ DÖVLƏT ƏMLAKI BARƏDƏ MƏLUMAT TOPLANIR
Azərbaycan Respublikası Prezidentinin 9 dekabr 1999-cu il tarixli Fərmanı ilə təsdiq edilmiş “Azərbaycan Respublikasında dövlət əmlakının registri haqqında Əsasnamə”yə uyğun olaraq İqtisadi İnkişaf Nazirliyinin Dövlət əmlakının özəlləşdirilməsi departamenti ölkədə daşınmaz dövlət əmlakı barədə məlumatların toplanması, təhlili və onların Mərkəzi registrə daxil olunması işini davam etdirir. Bu isə daşınmaz dövlət əmlakı barədə dolğun məlumatlara malik informasiya bazasının yaradılmasına, ayrı-ayrı sahələr arasında məlumat mübadiləsinin sürətləndirilməsinə imkan vermişdir.
1 iyul 2002-ci il tarixə Azərbaycanda və onun hüdudlarından kənarda yerləşən 8495-dən artıq dövlət müəssisə və təşkilatının, onların 4015 filialının 97633-dən çox daşınmaz əmlakı Mərkəzi registrdə qeydiyyata alınmışdır ki, bu sıraya nizamnamə kapitalında dövlət payı olan 1013 səhmdar cəmiyyətinin məlumatları da daxildir.
İnformasiya bazasına respublika ərazisində olan 1970 yarımçıq tikili barədə məlumatlar da daxil edilmişdir.
Ötən iyun ayı ərzində nazirliyin Dövlət əmlakının özəlləşdirilməsi departamentinə daxil olmuş məlumatların Mərkəzi registrin bazasına daxil edilməsi davam etdirilmişdir.
Ay ərzində 366 dövlət müəssisəsinin daşınmaz əmlakı barədə 1270 məlumat Mərkəzi registrə daxil edilmişdir.
Daşınmaz dövlət əmlakı üzərində baş verən dəyişikliklər, onların mülkiyyət mənsubiyyətinin dəyişməsi, icarəyə götürülməsi və s. barədə mütəmadi olaraq informasiya bazasında uyğun düzəlişlər aparılır.
Mərkəzi registrdə toplanmış məlumatlar müəssisə və obyektlər barədə operativ informasiya əldə olunmasında, onların özəlləşdirmə perspektivliyinin araşdırılmasında olduqca əhəmiyyətlidir.
İqtisadi İnkişaf Nazirliyinin
mətbuat xidməti
Bölmənin digər xəbərləri
