DAŞKƏSƏN RAYONUNA GÜCLÜ LEYSAN DÜŞMÜŞDÜR
Axşam saat 19.30-dan başlayan və dolu ilə müşayiət olunan leysan nəticəsində rayonda elektrik enerjisi kəsilmiş, rabitə əlaqəsi pozulmuşdur. Təcili görülən tədbirlər sayəsində rayona elektrik enerjisinin verilməsi və rabitə bərpa olunmuşdur.
Təbii fəlakət nəticəsində rayonun daxili yolları yararsız hala düşmüş, Daşkəsən-Gəncə avtomobil yolunun bir hissəsi dağılmışdır. Yaşayış binalarına, xidmət obyektlərinə ciddi ziyan dəymişdir.
Leysanın əmələ gətirdiyi güclü sel 4 nəfəri aparmışdır. Azərbaycan Neft Akademiyasının rayonun Kobalt qəsəbəsində təcrübə keçən birinci kurs tələbələri Ramilə Rafiq qızı Mahmudova və Leyla Faiq qızı Salayeva həlak olmuşlar.
Bayan kəndində 16 yaşlı Aysel və 10 yaşlı Əminə Məmmədova bacıları da selin qurbanı olmuşlar. Həlak olanlardan üçünün cəsədi tapılmışdır. Leyla Faiq qızı Salayeva isə axtırılır.
Selin nəticələrini aradan qaldırmaq üçün rayon fövqəladə hallar komissiyası tərəfindən zəruri tədbirlər görülür.
Bölmənin digər xəbərləri
