Davos 2026: Azərbaycan Dövlət Neft Fondu və “Brookfield” infrastruktur sahəsində strateji əməkdaşlığı möhkəmləndirir
Bakı, 21 yanvar, Tamilla Məmmədova, AZƏRTAC
Azərbaycan Respublikası Dövlət Neft Fondu (ARDNF) ilə aktivlərin idarə olunması üzrə ixtisaslaşmış dünyanın ən iri şirkətlərindən biri olan “Brookfield Asset Management” arasında niyyətlər haqqında protokolun imzalanması təkcə formal addım deyil, konkret investisiya istiqamətlərinə və strateji prioritetlərin üst-üstə düşməsinə əsaslanan praqmatik və uzunmüddətli əməkdaşlığın qurulmasına qarşılıqlı marağın ifadəsidir.
AZƏRTAC xəbər verir ki, tərəflər arasında əməkdaşlığın perspektivləri Azərbaycan iqtisadiyyatının əsas inkişaf istiqamətləri ilə birbaşa bağlıdır.
Tərəfdaşlıq çərçivəsində enerji keçidi sahəsində, o cümlədən enerji saxlama sistemləri, bərpaolunan enerji, eləcə də rəqəmsal infrastruktur üzrə investisiya imkanlarının öyrənilməsi planlaşdırılır. Bu istiqamətlər həm Azərbaycanın iqtisadiyyatın şaxələndirilməsi üzrə uzunmüddətli strategiyasına, həm də dünyanın müxtəlif regionlarında energetika, infrastruktur və rəqəmsal platformalar sahəsində iri layihələr həyata keçirən “Brookfield” şirkətinin investisiya profilinə uyğundur. Bu sektorlar üzrə potensial birgə layihələr ölkənin infrastrukturunun modernləşdirilməsində və qlobal iqtisadi və enerji çağırışlarına davamlılığının artırılmasında mühüm rol oynaya bilər.
Azərbaycan üçün “Brookfield Asset Management” ilə əməkdaşlıq uzunmüddətli institusional kapitalın cəlb edilməsi və ARDNF-in investisiya portfelinin diversifikasiyası baxımından praktiki əhəmiyyət daşıyır. Real aktivlərə investisiyalar ənənəvi maliyyə alətlərindən asılılığın azaldılmasına imkan verir və infrastrukturun, energetikanın və müasir texnologiyaların inkişafına əsaslanan dayanıqlı iqtisadi artım üçün baza yaradır.
“Brookfield Asset Management” üçün Azərbaycanla tərəfdaşlıq artan investisiya potensialına və sabit makroiqtisadi mühitə malik bazarda layihələrdə iştirak imkanları açır. Ölkənin suveren fondu ilə birgə fəaliyyət layihələrin institusional etibarlılığını gücləndirir və şirkətə infrastruktur və enerji aktivlərinin uzunmüddətli idarə edilməsində qlobal təcrübəsini tətbiq etməyə şərait yaradır.
Xatırladaq ki, yanvarın 21-də Prezident İlham Əliyev Davosda “Brookfield Asset Management” şirkətinin prezidenti Konnor Teskey ilə görüşüb. “Brookfield Asset Management”in real aktivlərə yönəlmiş qlobal investisiya fəaliyyəti nəzərə alınmaqla, görüş zamanı ölkəmizdə maraq doğuran investisiya sahələri və Azərbaycan Respublikasının Dövlət Neft Fondu ilə əməkdaşlıq çərçivəsində mümkün layihələr ətrafında fikir mübadiləsi aparılıb.
Görüş çərçivəsində ARDNF ilə “Brookfield Asset Management” arasında uzunmüddətli strateji əməkdaşlıq üzrə niyyətlər haqqında protokol imzalanıb. Sənəd mövcud strateji münasibətlərin institusional səviyyədə daha da dərinləşdirilməsini, fondun qlobal miqyasda nüfuzlu investisiya platformalarına çıxış imkanlarının genişləndirilməsini nəzərdə tutur. Bundan əlavə, 3–4 il ərzində ARDNF tərəfindən “Brookfield” tərəfindən idarə olunan fondlara və birgə investisiya layihələrinə 1,4 milyard ABŞ dollarınadək investisiya yatırılması imkanlarının qiymətləndirilməsi planlaşdırılır.
Bölmənin digər xəbərləri
