Deputat: I Dövlət Proqramının icrası işğaldan azad edilmiş əraziləri yüksək inkişafa qovuşduracaq
Bakı, 21 noyabr, AZƏRTAC
Böyük Qayıdışa dair I Dövlət Proqramı işğaldan azad edilmiş Qarabağ və Şərqi Zəngəzur iqtisadi rayonlarını yüksək inkişafa çatdıraraq cənnətə çevirəcək. Bu proqramın qəbul olunması “Azərbaycan 2030: sosial-iqtisadi inkişafa dair Milli Prioritetlər”inin nəzərdə tutulmuş 5 prioritetindən birinin yüksək səviyyədə həyata keçirməsinə yol açacaq. Həm də “Azərbaycan Respublikasının 2022-2026-cı illərdə sosial-iqtisadi inkişaf Strategiyası”nın işğaldan azad edilmiş ərazilərdə tam əhatə olunmasını ehtiva edəcək. Böyük Qayıdışa dair I Dövlət Proqramı çox əhatəlidir və kompleks şəkildə həyata keçiriləcək hədəfləri müəyyənləşdirir. Bu hədəflər hər il üçün ayrı nəzərdə tutularaq yekun nəticəyə 2026-cı ildə nail olmağı məqsəd qoyur.
Bu fikirləri AZƏRTAC-a açıqlamasında Milli Məclisin deputatı Azər Badamov söyləyib.
“Böyük Qayıdışa dair I Dövlət Proqramının prioritet istiqamətləri əsasən 1) təhlükəsizlik; 2) müasir yaşayış məntəqələrinin salınması; 3) əhalinin dayanıqlı məskunlaşması; 4) əhatəli və qabaqcıl standartlara cavab verən infrastrukturun qurulması; 5) ərazilərin iqtisadi inkişafının dəstəklənməsi; 6) ekoloji təmiz mühitin təmin edilməsidir. Müharibənin başa çatdığı iki ildə artıq bu istiqamətlərdə işlərin uğurla görülməsinə başlanılıb. Təhlükəsizliyin təmin edilməsi məqsədilə minalardan təmizlənmə işləri sürətlə aparılır, həmin ərazilərin müdafiə olunmasının gücləndirilməsi üçün yeni hərbi hissələr tikilib istifadəyə verilir. Görülən işlər Böyük Qayıdışla öz doğma torpaqlarına qayıdacaq insanların təhlükəsiz yaşayışını təmin edəcək.
Zəngilan rayonunun Ağalı kəndindən başlayan Böyük Qayıdış “ağıllı kənd” konsepsiyası ilə yenidən tikilib. Bu konsepsiya ilə oraya qayıtmış insanlara yüksək yaşayış təqdim olunub. İşğaldan azad olunmuş bütün şəhərlərin Baş panları təsdiq olunub və müasir infrastrukturun yaradılması istiqamətində işlər uğurla davam etdirilir. Proqrama uyğun olaraq 2026-cı ilə qədər 35 mindən çox ev və ya mənzil tikilərək insanların qayıdışına hazır olacaq. O cümlədən bütün şəhər və kəndləri birləşdirən yollar müasirləşir, sosial infrastruktur yenidən qurulur”,-deyə A.Badamov vurğulayıb.
Deputat qeyd edib ki, Böyük Qayıdışa dair I Dövlət Proqramı ancaq bu ərazilərə insanları qaytarmaqla kifayətlənmir. Proqramda həm də dayanıqlı icmaların yaradılması, sahibkarlıq fəaliyyəti üçün əlverişli mexanizmlərin, gələcəkdə məşğulluğun təmin edilməsi və s. kimi kompleks məqsədlər nəzərdə tutulur. İşğaldan azad olunmuş ərazilərin böyük iqtisadi potensialı var. Bu potensialın reallaşdırılması üçün işğaldan azad olunmuş ərazilərdə yeni müəssisələr tikilməli, sahibkarlıq fəaliyyətləri qurulmalıdır. Bu fəaliyyətlərin uğurla qurulması üçün investorları stimullaşdıracaq uzunmüddətli vergi və gömrük güzəştləri tətbiq olunacaq. Proqramın icrası müddətində işğaldan azad olunmuş torpaqlarda yaradılacaq yeni istehsal sahələri bu ərazilərə qayıdacaq insanların işlə təmini məsələlərini də qabaqcadan həll etməyə kömək edəcək.
O əlavə edib ki, Dövlət Proqramında hər il görüləcək işlər və hədəflər müəyyənləşdirilib. Proqramda həm də görüləcək işlərə nəzarət və hesabatlılıq, tədbirlərin monitorinqi və qiymətləndirlməsi mexanizmi də nəzərdə tutulur. Qiymətləndirmə işləri 3 mərhələ üzrə ilkin, aralıq və yekun nəticələr üzrə aparılacaq. Bu da Dövlət Proqramının icrasında müvafiq tərəflərin məsuliyyətini artıracaq. Böyük Qayıdışa dair I Dövlət Proqramının icrası və görüləcək bütün işlər Azərbaycan dövlətinin gücü hesabına icra ediləcək. Amma bununla yanaşı, ölkəmiz xarici yardımların qəbuluna da açıqdır. Hesab edirəm ki, müəyyən olunmuş dövrdə Dövlət Proqramının uğurlu icrası işğaldan azad edilmiş əraziləri yüksək inkişafa qovuşduracaq və dünyada nümunəvi bir regiona çevirək.
Bölmənin digər xəbərləri
