Deputat: YAP daim güclü, müstəqil və bütöv Azərbaycan uğrunda amala xidmət edib
Bakı, 21 noyabr, AZƏRTAC
1992-ci ilin noyabrında Naxçıvanda təməli qoyulan Yeni Azərbaycan Partiyası ötən müddət ərzində, sadəcə, siyasi təşkilat deyil, Azərbaycanın müstəqillik, inkişaf və ərazi bütövlüyü uğrunda mübarizəsinin əsas hərəkətverici qüvvəsinə çevrilib. 1993-cü ildən başlayaraq ölkədə keçirilən bütün seçkilərdə xalqın etimadını qazanan YAP-ın əldə etdiyi uğurlar təşkilatın qarşısına qoyduğu məqsədlərin respublikamızın daxili və xarici siyasətinin həyata keçirilməsində yaxından iştirak etməsi ilə sıx şəkildə bağlıdır. Ölkəmizin ictimai-siyasi, sosial-iqtisadi və mədəni-humanitar sahələrinin inkişafında partiyanın qarşısına qoyduğu vəzifələr Ulu Öndər Heydər Əliyev yoluna sadiqliyi ilə layiqincə yerinə yetirilib.
Bu fikirləri AZƏRTAC-a açıqlamasında Milli Məclisin deputatı Anar Məmmədov deyib.
Deputat bildirib ki, YAP-ın yaranması, ölkədə siyasi sabitliyi bərpa etmək, dövlətçilik institutlarını gücləndirmək və Azərbaycanda anarxiyanın qarşısını almaq üçün yeganə çıxış yolu idi. 1993-cü ildə Heydər Əliyevin xalqın tələbi ilə hakimiyyətə qayıdışı və YAP-ın hakim partiyaya çevrilməsi ilə Azərbaycanın tarixinə “Qurtuluş Missiyası” kimi yazıldı.
Fəaliyyəti ərzində YAP Heydər Əliyev ideologiyasına sadiq qalaraq, müasir Azərbaycan dövlətinin fundamental təməllərini qurdu. Partiya bu gün özünün Müzəffər Sədri, Prezident İlham Əliyevin rəhbərliyi ilə fəaliyyətini yeni mərhələdə davam etdirir.
“Sözlə əməl birliyi, tutduğu yola sadiqliyi YAP-ın cəmiyyətdə nüfuzunun artmasında əhəmiyyətli rol oynadı. O tarixi hadisədən ötən 33 il Yeni Azərbaycan Partiyasının həyatında xalqa, dövlətə və dövlətçiliyə xidmət kimi səciyyələnir. Eyni zamanda, 33 ilin təcrübəsinə əsaslanaraq bu reallığı da böyük fəxr hissi ilə qeyd edirik ki, ötən müddət ərzində Azərbaycan dövləti qarşıya qoyulan bütün vəzifələri yüksək səviyyədə yerinə yetirib”, - deyə Anar Məmmədov vurğulayıb.
Deputat bildirib ki, Prezident İlham Əliyevin sədri olduğu partiya məramı, proqramı, həm də fəaliyyəti və əldə etdiyi nailiyyətlərlə kifayətlənmir, Azərbaycanın parlaq gələcəyi naminə ilklərə imza atır, cəmiyyətimizdəki yeniliklərlə, dəyişikliklərlə bir addımlayır.
A.Məmmədov partiyanın tarixində dönüş nöqtəsinin 2020-ci ildə, Prezident İlham Əliyevin rəhbərliyi ilə 44 günlük Vətən Müharibəsində qazanılan tarixi Zəfər olduğunu vurğulayıb.
Onun sözlərinə görə, dünənin, bu günün və gələcəyin partiyasının VII qurultayı siyasi təşkilatın tarixində yeni mərhələ oldu. Yeni Azərbaycan Partiyasının VII qurultayının keçirilməsi və qurultayda yeni Nizamnamənin qəbul olunması, müəyyən yeniliklərin edilməsi, struktur dəyişikliyi siyasi islahatların tərkib hissəsi kimi dəyərləndirildi. VII qurultayda qəbul olunmuş qərarlar milli həmrəyliyin yeni inkişaf mərhələsinin başlandığını nümayiş etdirdi. Qurultayda 6 siyasi partiyanın Yeni Azərbaycan Partiyasına qoşulmaq barədə qərarı milli həmrəyliyin gücləndirilməsinin təqdimatı oldu. Prezident İlham Əliyev qurultaydakı geniş məzmunlu çıxışında partiyanın yarandığı vaxtdan indiyədək müstəqil dövlətçiliyin və demokratik siyasi sistemin möhkəmlənməsi, ölkəmizin davamlı inkişafı, milli birliyin və vətəndaş həmrəyliyinin təmin olunması istiqamətində göstərdiyi fəaliyyətlə bağlı dəyərli fikirlər irəli sürdü. Prezident İlham Əliyevin qeyd etdiyi kimi, partiyamızın VII qurultayı ölkəmizin ictimai-siyasi həyatında önəmli hadisədir. Yeni Azərbaycan Partiyası nəinki Azərbaycanın, Cənubi Qafqazın ən böyük siyasi partiyasıdır. Partiyamızın böyük ənənələri var. Partiyanın VII qurultayı bir daha göstərdi ki, ölkəmizdə siyasi mədəniyyətin və siyasi sistemin formalaşmasında, təkmilləşməsində siyasi təşkilatın rolu və yeri xüsusidir.
“Bu gün YAP yenidənqurma dövrünə qədəm qoyub. Partiyanın əsas məqsədi Qarabağda həyata keçirilən “Böyük Qayıdış” Proqramını dəstəkləmək, azad olunmuş ərazilərdə infrastrukturun bərpası, iqtisadiyyatın canlandırılması və məcburi köçkünlərin öz doğma yurdlarına qayıtmasını təmin etməkdir. Yeni Azərbaycan Partiyası 33 il ərzində dəyişməz bir amala xidmət etmişdir: Güclü, müstəqil və bütöv Azərbaycan”, - deyə deputat vurğulayıb.
Bölmənin digər xəbərləri
