Dönərin emalı aparılan obyektlərin əməkdaşları üçün təlim keçiriləcək
Bakı, 13 may, AZƏRTAC
Azərbaycan Qida Təhlükəsizliyi İnstitutu (AQTİ) ölkəmizdə qida təhlükəsizliyi sahəsində fəaliyyət göstərən sahibkarlıq subyektlərinin işinin mövcud qanunvericiliyin və beynəlxalq standartların tələblərinə uyğun təşkili məqsədilə mayın 23-də dönərin emalı aparılan obyektlərin əməkdaşları üçün ödənişsiz təlim keçiriləcək.
İnstitutun İctimaiyyətlə əlaqələr şöbəsindən AZƏRTAC-a bildiriblər ki, saat 15:00-da başlayacaq təlim barədə daha ətraflı məlumat almaq və təlimdə iştirak etmək istəyən sahibkarlıq subyektləri 070 223 12 32 nömrəli telefona zəng edə bilərlər.
Qeyd edək ki, təlim zamanı iştirakçılara dönərin emalı aparılan obyektlərin qeydiyyatdan keçirilməsi və bu sahə ilə bağlı qanunvericiliyin digər tələbləri haqqında ətraflı məlumat veriləcək. Onlar çiy dönərin emalı üçün istifadə olunan ətə və hazır çiy dönər yarımfabrikatları ilə işləyən ictimai-iaşə obyektlərinə dair tələblər, işçilərin tibbi müayinədən keçirilməsi, həmçinin müvafiq müəssisələrdə qida ilə təmasda olan səthlər, alətlər, avadanlıqlar və ləvazimatlar haqqında məlumatlandırılacaqlar.
Təlim zamanı mövzu ətrafında müzakirələr aparılacaq, suallar cavablandırılacaq.
Bölmənin digər xəbərləri
