Dövlət Dil Komissiyası yanında Monitorinq Mərkəzində Müəllimlər Günü qeyd olunub
Bakı, 5 oktyabr, AZƏRTAC
Dövlət Dil Komissiyası yanında Monitorinq Mərkəzində 5 Oktyabr - Beynəlxalq Müəllimlər Günü münasibətilə “Gələcəyimiz əmin əllərdədir” adlı tədbir keçirilib.
Mərkəzdən AZƏRTAC-a bildirilib ki, tədbirdə Zərifə Əliyeva adına liseyin direktoru Fərqanə İsayeva, Bakı Turizm Peşə Məktəbinin direktoru dosent Neylüfər Kərimova, BDU-nun Beynəlxalq münasibətlər və iqtisadiyyat fakültəsinin dosenti tarix elmləri üzrə fəlsəfə doktoru Təranə Tağıyeva, 220 nömrəli məktəb-liseyin müəllimi filologiya üzrə fəlsəfə doktoru Xanım Qasımova, 47 nömrəli məktəbin müəllimi Aybəniz Rüstəmova, 82 nömrəli məktəbin müəllimi Şəlalə Məmmədova və Monitorinq Mərkəzinin əməkdaşları iştirak ediblər.
Monitorinq Mərkəzinin direktoru professor Sevinc Əliyeva müəllimləri peşə bayramları münasibətilə təbrik edərək, gənclərin vətənə layiqli övlad, dövlətə və xalqımıza bağlı nümunəvi vətəndaş, milli-mənəvi dəyərlərə sadiq şəxsiyyət kimi yetişməsində bu müqəddəs peşə sahiblərinin üzərinə düşən mühüm missiyadan danışıb. Sevinc Əliyeva Aprel döyüşlərində, 44 günlük Vətən müharibəsində və sonrakı dövrlərdə Azərbaycan oğullarının göstərdikləri qəhrəmanlığı təhsil ocaqlarında milli ruhun və vətənpərvərliyin təbliğinin nəticəsi kimi dəyərləndirib. Bildirib ki, elm və təhsil sahəsində həyata keçirilən hər bir islahatın əsasında məhz milli təəssübkeşlik, adət-ənənələrimizin təbliği, ana dilinə sevginin aşılanması və milli-mənəvi dəyərlərə ehtiram dayanır. Bu kimi yüksək dəyərlərin aşılanmasında Azərbaycan dili və ədəbiyyatı müəllimlərinin üzərinə mühüm vəzifələr düşdüyünü vurğulayan Sevinc Əliyeva doğma dilimizin tətbiqinin Monitorinq Mərkəzi üçün hər zaman prioritet istiqamət olduğunu bildirib. Qeyd olunub ki, Azərbaycan dili fənninin tədris səviyyəsi, dərs vəsaitlərində mətnlərin düzgün seçilməsi, tapşırıqların hazırlanmasında zəruri metodik göstərişlərin nəzərə alınması, şagirdlərdə yazı vərdişlərinin formalaşdırılması, orfoqrafiya və orfoepiya normaları ilə bağlı biliklərin tətbiqi və möhkəmləndirilməsi üçün praktik məşğələlərin təşkili hamını narahat edən ciddi məsələlər sırasındadır.
Mərkəzin mütəxəssisi Gülnar İsmayılova “Müəllim uğurlu gələcəyin təminatçısıdır” adlı məruzəsində doğma dilimizin zənginliyindən və qorunmasından bəhs edib. Günümüzdə Azərbaycan dilinin tədrisi ilə bağlı aktual problemlərə diqqət çəkib. Belə ki, orta məktəb dərsliklərinin dilində müşahidə olunan qrammatik qaydalarda sistemsizlik, durğu işarələrinin buraxılması, söz sırasının pozulması və ya sözlərin yerində işlədilməməsi, fikir mücərrədliyi, ciddi üslub və ifadə səhvlərinin nəzərə çarpması, şagirdlərdə imla və inşa yazı qabiliyyətinin zəif inkişafı və s. təəssüf doğuran hallar kimi dəyərləndirilib.
Dosent Təranə Tağıyeva “Dil xalqın milli-mənəvi dəyərlərini yaşadan yeganə vasitədir” adlı məruzəsində Azərbaycan dilini xalqımızın milli-mənəvi dəyərlərinin daşıyıcısı, varlığımızı müəyyən edən mənəvi sərvət kimi səciyyələndirib. Bildirilib ki, qədim tarixi kökə malik dilimizi qorumaq və onun saflığı uğrunda mübarizə aparmaq dilin daşıyıcısı kimi hər bir azərbaycanlının ümdə vəzifəsidir. Dilin inkişafına mane olan amilləri təhlil edən T.Tağıyeva bu prosesi müsbət məcraya yönəltmək üçün insanların təfəkkürünə, düşüncə tərzinə təsir etməyin, milli-mənəvi dəyərlərin təbliğinin vacibliyini vurğulayıb.
“Dilimizin təbliği və sevdirilməsində dərsliklərin rolu” adlı məruzə ilə çıxış edən filologiya üzrə fəlsəfə doktoru Xanım Qasımova şagirdlərin ədəbi dilə yiyələnməsində, dilimizin təbliğində və düzgün tədrisində orta məktəb dərsliklərinin əhəmiyyətindən danışıb. Bildirib ki, dərs vəsaitlərinə mətnlər seçilərkən milli ədəbiyyata müraciət edilməsini, klassik sənətkarlarımızın əsərlərinin motivləri əsasında, uşaqların anlaya biləcəyi hekayə və mətnlərə daha çox yer verilməsini zəruri hesab edib. Qeyd edib ki, şagirdlərə məlumat məhz dərsliklərlə ötürüldüyü üçün onların tərtibatı ilə yanaşı elmi materialların düzgün seçilməsi də olduqca əhəmiyyətlidir.
Tədbir təhsil sahəsində aktual məsələlər barədə fikir mübadiləsi ilə davam edib, müzakirələrin Azərbaycan təhsilinə əsaslı töhfə verəcəyi ifadə olunub.
Bölmənin digər xəbərləri
