DÖVLƏT GÖMRÜK KOMİTƏSİ MƏTBUAT XİDMƏTİNİN MƏLUMATI
Aprelin 21-də Xaçmaz gömrükxanasının “Yalama” gömrük postunda ölkə ərazisindən gizli çıxarılmağa cəhd göstərilən 222 kiloqramdan çox qara kürü tutulmuşdur.
“Bakı-Kiyev” sərnişin qatarına gömrük baxışı zamanı bələdçi Məmmədov İlham Əlibala oğluna məxsus olan və vaqonun döşəmə hissəsinin altındakı müxtəlif gizli saxlanc yerlərində gizlədilmiş 222 kiloqramdan artıq strateji əhəmiyyətli məhsul - qara kürü aşkar edilmişdir. Fakt üzrə Dövlət Gömrük Komitəsində təhqiqat aparılır.
Ümumiyyətlə, son günlərdə Xaçmaz gömrükxanası üzrə ölkə ərazisindən gizli çıxarılmağa cəhd göstərilən 393 kiloqramdan çox kürü tutulmuşdur.
Vətəndaşların nəzərinə çatdırırıq ki, Nazirlər Kabinetinin 2001-ci il 31 may tarixli qərarına görə, hər bir şəxs özü ilə ölkədən cəmi 600 qram kürü apara bilər.
X x x
Bakı Şəhər İcra Hakimiyyəti yüksək səsyayıcı qabiliyyətinə malik olan partlayıcı uşaq oyuncaqlarının satışının qadağan edilməsi barədə sərəncamında Bakı Baş Gömrük İdarəsindən belə malların ölkə paytaxtına gətirilməsinin qarşısının alınmasını xahiş etmişdir. Gömrük əməkdaşlarının həyata keçirdiyi tədbirlər nəticəsində Birləşmiş Ərəb Əmirliklərindən Azərbaycan vətəndaşı Dadaşbala Dadaşovun adına daxil olmuş konteynerdə müşayiət sənədlərində və gömrük bəyannaməsində başqa adla göstərilən, ümumi dəyəri 192 milyon manatlıq 19200 blok yüksək səsyayıcı qabiliyyətinə malik taraqqı pirotexniki vasitəsi, Çin Xalq Respublikasından isə Azərbaycan vətəndaşı Vaqif Hümbətovun adına daxil olan konteynerdə ümumi dəyəri 130 milyon manatlıq 223 qutu taraqqı və fişəng pirotexniki vasitəsi aşkar edilərək götürülmüşdür. Gömrük əməkdaşlarının son vaxtlar həyata keçirdiyi reydlər nəticəsində 670 ədəd bu cür uşaq oyuncaqları satışdan yığışdırılmışdır. Qeyd edək ki, yüksək səsyayıcı qabiliyyətinə malik olan uşaq oyuncaqları ölkə ərazisində kustar üsulla da istehsal edilir.
Müsadirə edilən və ümumi dəyəri 322 milyon manatdan yuxarı olan 400 qutu yüksək səsyayıcı qabiliyyətinə malik uşaq oyuncaqları gömrük əməkdaşlarının iştirakı ilə Sumqayıt ərazisində yandırılmışdır.
X X X
Aprelin 22-dən etibarən Rusiya Federasiyası Dövlət Gömrük Komitəsinin təcrübəli mütəxəssisləri Dövlət Gömrük Komitəsinin Tədris Mərkəzində yerli gömrük orqanlarının əməkdaşları üçün peşə treninqi keçirməyə başlamışlar.
Xatırladaq ki, Dövlət Gömrük Komitəsi ilə BMT-nin İnkişaf Proqramı arasında “Dövlət Gömrük Komitəsinin potensialının gücləndirilməsi və məlumatların ötürülməsi şəbəkəsinin yaradılması” layihəsində gömrük əməkdaşlarına nəzəri biliklərin, beynəlxalq təcrübədə istifadə olunan üsul və qaydaların tətbiqi mexanizmlərinin aşılanması da nəzərdə tutulmuşdur.
Gömrük Komitəsi sədrinin birinci müavini, gömrük xidməti general-mayoru Aydın Əliyev məşğələlərin başlanmasından əvvəl çıxış edərək, layihənin ikinci fazasında da gömrük əməkdaşlarının peşə vərdişlərinin artırılması ilə bağlı treninqin uğurlu olacağına, təcrübəli Rusiya mütəxəssislərinin proqramda nəzərdə tutulan təlimləri yüksək səviyyədə keçirəcəklərinə əmin olduğunu bildirdi.
15 gün davam edəcək treninqdə gömrük ərazisindən kənar emal rejimində gömrük rəsmiləşdirilməsi və nəzarət, hava nəqliyyatında yanacağın gömrük rəsmiləşdirilməsi, daimi yaşayış yerini dəyişən vətəndaşların nəqliyyat vasitələrinin gömrük rəsmiləşdirilməsinə nəzarət, narkotiklərin qeyri-qanuni dövriyyəsinə qarşı mübarizənin təşkili, risk menecmentinin aparılması və sair mövzularda məşğələlər aparılacaqdır.
Bölmənin digər xəbərləri
