REGİONLAR
Dövlət İmtahan Mərkəzinin təşkilatçılığı ilə “Naxçıvan” Universitetində “Karyera günü” keçirilib
Naxçıvan, 15 noyabr, AZƏRTAC
Naxçıvan Muxtar Respublikası Dövlət İmtahan Mərkəzinin təşkilatçılığı ilə tələbə-gəncləri ixtisaslarına, bilik və bacarıqlarına uyğun vəzifələrlə, habelə keçirilən müsabiqələrin qaydaları və şərtləri ilə tanış etmək üçün “Naxçıvan” Universitetində “Karyera günü” keçirilib.
Dövlət İmtahan Mərkəzinin mətbuat xidmətindən AZƏRTAC-ın Naxçıvan bürosuna bildirilib ki, tədbirdə çıxış edən universitetin rektoru Nurlana Əliyeva məzunların işlə təmin edilməsi məqsədilə dövlət qurumları ilə əməkdaşlığın qurulması, tələbələrin ixtisasları üzrə dövlət müəssisələrində təcrübə keçmələri haqqında danışıb.
Naxçıvan Muxtar Respublikası Ali Məclisi Sədrinin “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsinə dair əlavə tədbirlər və innovasiyaların dəstəklənməsi haqqında” 2019-cu il 3 aprel tarixli Sərəncamının əhəmiyyətini vurğulayan rektor qeyd edib ki, ixtisasların müvafiq təşkilatlara hamiliyə verilməsi məzunların gələcək karyera inkişafında xüsusi rol oynayır. Mütəmadi görüşlərin keçirilməsi tələbələrə karyera planlama fikrini aşılayır, karyera seçiminə kömək göstərir və praktiki təcrübələrini inkişaf etdirir.
“Yaxşı təhsil almış, formalaşmış gənc həm də sabahın istedadlı mütəxəssisidir. Bu gün muxtar respublikamızda gənclərin inkişafı və özünütəsdiqi üçün zəruri şərait var”, - deyən universitetin rektoru Nurlana Əliyeva Dövlət İmtahan Mərkəzi tərəfindən universitetdə “Karyera günü”nün keçirilməsinin tələbə-gənclərin gələcəkdə özlərinə uyğun ixtisaslar üzrə düzgün peşə seçmələrinə dəstək verəcəyinə əminliyini bildirib.
Naxçıvan Muxtar Respublikası Dövlət İmtahan Mərkəzinin sədri İsmayıl Qəribli tədbirdə çıxış edərək deyib ki, bu gün Ali Məclis Sədrinin diqqət və qayğısı ilə digər sahələrdə olduğu kimi, dövlət qulluğu sahəsində də uğurlu islahatlar aparılıb, muxtar respublikada müasir dövlət idarəçilik sistemi formalaşdırılıb. Dövlət idarəçiliyi sahəsində islahatların əsas istiqamətlərdən biri də müasir tələblərə cavab verən kadr siyasətinin həyata keçirilməsidir. Ali Məclis Sədrinin rəhbərliyi ilə həyata keçirilən kadr siyasətinin əsas məqsədi dövlətə və cəmiyyətə xidmət üçün lazımi keyfiyyətlərə malik mütəxəssislərin formalaşdırılması, habelə dövlət orqanlarının yüksək peşəkarlığa malik, vicdanlı, məsuliyyətli və Vətənə sədaqətli işçilərin cəlb olunmaqla komplektləşdirilməsidir.
Bu gün muxtar respublikada gənclərin məşğulluğu üçün geniş şəraitin yaradıldığını bildirən İsmayıl Qəribli deyib ki, hazırda Dövlət İmtahan Mərkəzi tərəfindən 33 istiqamət üzrə işə qəbul, attestasiya, sertifikasiya və qiymətləndirmə imtahanları keçirilir. Müsabiqələrdə iştirak edənlərin sayının ildən-ilə artması bu sahədə həyata keçirilən dövlət siyasətinin öz bəhrəsini verdiyini göstərir. Gənclərin dövlət orqanlarına marağının artması müsabiqələrdə böyük rəqabət vəziyyətinin yaranmasına da səbəb olur. Buna görə də gənclər dövlətin yaratdığı şəraitdən istifadə etməklə karyera hədəflərini müəyyənləşdirməli və onlara çatmaq üçün səylə çalışmalıdırlar.
Sonra Dövlət İmtahan Mərkəzinin baş məsləhətçisi Məmməd Babayev slayd vasitəsilə “Naxçıvan Muxtar Respublikasında vətəndaşların dövlət orqanlarına və digər müəssisələrə işə qəbulu qaydaları” haqqında tələbə-gənclərə ətraflı məlumat verib. Dövlət qulluğuna, dövlət qulluğunun xüsusi növlərinə, eləcə də dövlət müəssisə və təşkilatlarına işə qəbul, Dövlət İmtahan Mərkəzi tərəfindən imtahan prosesinin təşkili və keçirilməsi qaydaları, imtahanların məzmunu, sual sayları və keçid balları ilə tanışlıq tələbə-gənclərin marağına səbəb olub, suallar cavablandırılıb.
Universitetin 50-dən çox tələbəsinin iştirak etdiyi tədbirin sonunda onlara Dövlət İmtahan Mərkəzinin fəaliyyəti, imtahanların keçirilməsi qaydaları və digər məlumatları özündə əks etdirən bukletlər paylanılıb.