DÖVLƏT SƏRHƏD XİDMƏTİNİN RƏİSİ, SƏRHƏD QOŞUNLARI KOMANDANI GENERAL-LEYTENANT ELÇİN QULİYEVİN ÇIXIŞI
Cənab Ali baş komandan!
Qüdrətli və firavan, müstəqil və əzəmətli Azərbaycan naminə qətiyyətli və uğurlu fəaliyyətinizin, həyatımızın bütün sahələri kimi, dövlət sərhədlərinin mühafizəsinə diqqətinizin göstəricilərindən olan Zaqatala Sərhəd Dəstəsinin qarnizonunda Sizi salamlayır, dərin hörmət və ehtiramımızı bildirirəm.
Cənab Ali baş komandan!
Cənab generallar, zabitlər, gizirlər, çavuşlar və əsgərlər!
Öz həyat və fəaliyyəti ilə ölməzliyə ucalan dahi öndərimiz Azərbaycan sərhəd mühafizəsinin inkişaf mərhələsinin müəllifi və ilhamçısı olmuşdur. Heydər Əliyev dühasına söykənən dövlətçilik siyasətinin ardıcıl surətdə davam etdirilməsi sayəsində Azərbaycan sərhəd mühafizəsi qısa zaman ərzində çevik, qarşıya qoyulan tapşırıqları icra etməyə qadir, peşəkar kadr zabit heyətinə və müasir mühafizə infrastrukturuna malik sərhəd xidməti səviyyəsinə çatmaqdadır. Bu illər ərzində əldə etdiyimiz ən böyük nailiyyətlərdən biri də ölkəmizin şimal və şimal-qərb sərhədlərinin tam mühafizə altına götürülməsi, Xudat, Şəki, Zaqatala və Şəmkir sərhəd dəstələrinin xidməti döyüş fəaliyyətinə başlaması olmuşdur. Yeni yaranmış sərhəd dəstələri arasında Zaqatala Sərhəd Dəstəsi xüsusi yer tutur. Yarandığı müddət ərzində sərhəd dəstəsi ciddi xidməti nailiyyətlər əldə etmişdir. Bu nailiyyətlərin əldə edilməsində yerli əhali hər zaman sərhədçilərə arxa olmuş, köməyini bizdən əsirgəməmişdir. Sərhəd dəstəsinin ən böyük nailiyyətlərindən biri Ermənistanın xüsusi xidmət orqanları tərəfindən maliyyələşdirilən, Azərbaycanın işğal altında olan ərazilərindəki terrorçu bazalarında hazırlıq keçmiş, 2001-2002-ci illərdə Zaqatala və Balakən rayonları ərazisində yerli əhaliyə və dövlət orqanlarına silahlı basqınlar və başqa terror-təxribat əməlləri törətmiş, yerli əhali arasında Hacı Maqomedovun dəstəsi kimi tanınan cinayətkar qrupun zərərsizləşdirilməsi, onun başçısının isə məhv edilməsi olmuşdur.
Cənab Ali baş komandan!
Əbədi və sarsılmaz dövlət müstəqilliyimizin əsas atributlarından biri olan Azərbaycan Respublikasının sərhədlərinin qorunması kimi şərəfli, eyni zamanda, çox məsuliyyətli iş bizə tapşırılmışdır. Bu vəzifənin icrası üçün Azərbaycan sərhədçilərinə olan diqqət və qayğınızı hər zaman hiss edirik. Dövlət Sərhəd Xidmətinin inkişafı üçün tərəfinizdən bütün şərait yaradılmışdır. 2005-ci il avqustun 16-da Dövlət Sərhəd Xidmətinin Mərkəzi aparatında sərhəd dəstələrinə döyüş bayraqlarını təqdim etməyiniz, Heydər Əliyev Elmi Araşdırmalar Mərkəzinin açılışında iştirakınız, oktyabr ayının 12-də Azərbaycan-Gürcüstan dövlət sərhədinin mühafizəsi ilə şəxsən tanış olmağınız, bir sıra əməkdaşlarımızı ali hərbi rütbələrə və yüksək dövlət mükafatlarına layiq görməyiniz bütün şəxsi heyətimiz tərəfindən böyük ruh yüksəkliyi ilə qarşılanmışdır. Sərhədçilər qarşısında çıxışlarınız Xidmətimizin prioritet istiqamətlərini müəyyənləşdirmişdir. Dövlət sərhədlərinin mühafizəsinin texniki inkişafına dair ötən il dekabrın 27-də təsdiq etdiyiniz beşillik Dövlət Proqramının ən qısa zamanda yerinə yetirilməsi üçün bütün səylərimizi səfərbər etmişik. Bu Dövlət Proqramının icrası üzrə Zaqatala sərhəd dəstəsinin 6 sərhəd zastavası artıq kompleks şəkildə inşa olunmuşdur. Yaxın günlərdə onların açılış mərasimlərinin keçirilməsi planlaşdırılmışdır.
Beynəlxalq terrorçuluğa, qeyri-leqal miqrasiyaya, qaçaqmalçılığa qarşı mübarizənin gücləndirilməsi, şəxsi heyətin döyüş və səfərbərlik hazırlığının artırılması, mənəvi-psixoloji durumun yüksək səviyyədə saxlanılması, kadrların hazırlanması sisteminin təkmilləşdirilməsi, beynəlxalq sərhəd əməkdaşlığının inkişafı, hərbi qulluqçuların maddi, sosial-hüquqi təminatının yaxşılaşdırılması üzrə mühüm tədbirlər həyata keçirilməkdədir.
Möhtərəm Prezident!
Cənab Ali baş komandan!
Ötən ilin avqust ayında Dövlət Sərhəd Xidmətinin Mərkəzi aparatındakı çıxışınızda söylədiyiniz kimi, Azərbaycan bölgədə sabitlik məkanına, təhlükəsizlik adasına çevrilmişdir. Bu, Sizin həyata keçirdiyiniz siyasətin məntiqi nəticəsidir. Biz sərhədçilərin vəzifəsi dövlətçiliyimizə qarşı olan təzyiqlərin qarşısını almaqdır. Bu gün hər bir Azərbaycan sərhədçisi xidmətində mətin, məramında inamlıdır. Gələcəyimizə olan bu inamı bizdə yaradan keçmişimiz və gerçəkliyimizdir. Dahi öndərin ideyaları, onların qətiyyətlə, dönmədən, ardıcıl həyata keçirilməsi və inkişaf etdirilməsidir. Bütün şəxsi heyətimiz adından Sizi əmin edirəm ki, Heydər Əliyev ideyalarının daşıyıcısı olan Azərbaycan sərhədçiləri xidməti döyüş fəaliyyətləri, yüksək peşəkarlıqları, nümunəvi nizam-intizamı, Azərbaycan dövlətçiliyinə, xalqına, Prezidentinə sadiqliyi ilə daim seçiləcək və təqdim etdiyiniz döyüş bayraqlarını hər zaman uca tutacaqlar.
Cənab Ali baş komandan, məruzə bitdi.
X X X
Prezident İlham Əliyev görüşdə nitq söylədi.
Bölmənin digər xəbərləri
