DÖVLƏTİMİZİN HƏRTƏRƏFLİ İNKİŞAFINA VƏ MÖHKƏMLƏNMƏSİNƏ MİSİLSİZ TÖHFƏLƏR VERMİŞ TARİXİ ŞƏXSİYYƏT
AZƏRTAC xəbər verir ki, Yeni Azərbaycan Partiyası Şuşa rayon təşkilatında ulu öndər Heydər Əliyevin 85 illik yubileyinə həsr olunmuş tədbir keçirilmişdir.
Təşkilatın sədri Elxan Ələkbərov ümummilli lider Heydər Əliyevin əziz xatirəsinin təkcə Azərbaycanda deyil, dünyanın bir çox ölkələrində də qeyd edildiyini vurğulamış, onun zəngin və dəyərli fəaliyyətinin gələcək nəsillər üçün örnək olduğunu bildirmişdir.
Partiya fəalı Yunis Hüseynovun məruzəsi dinlənilmişdir. Məruzəçi demişdir ki, XX əsrdə Azərbaycanın bəxtinə Heydər Əliyev kimi görkəmli siyasi və dövlət xadimi düşmüşdür. Keçmiş SSRİ hökumətində ali vəzifələrə yüksəlmiş türk dünyasının böyük oğlu səlahiyyətlərindən Azərbaycanın iqtisadi və sosial tərəqqisi, milli oyanışı üçün məharətlə istifadə etmişdir. O vaxtlar Heydər Əliyevin əvəzsiz xidmətləri sayəsində Azərbaycan ittifaq respublikaları arasında qabaqcıl yerə çıxmış, müstəqillik dövründə isə dünyanın bütün aparıcı dövlətləri ilə sıx əlaqələr yaratmışdı. Natiq ulu öndərimizin zəngin həyat və fəaliyyətinin müxtəlif dövrlərini geniş şərh edərək, xalqın təkidi ilə ikinci dəfə hakimiyyətə qayıdışının parçalanmaqda olan Azərbaycanın tarixində müstəsna rolunu vurğulamışdır. Azərbaycan məhz bu dahi insanın qətiyyəti, siyasi iradəsi, uzaqgörənliyi və böyük dövlətçilik təcrübəsi sayəsində müstəqil, sivil dövlət quruculuğu yoluna qədəm qoymuşdur. Bu gün isə Azərbaycan Heydər Əliyev ideyalarının layiqli davamçısı Prezident İlham Əliyevin rəhbərliyi ilə regionun ən qüdrətli dövlətinə çevrilmişdir. Yunis Hüseynov şuşalıların rəyini ifadə edərək demişdir ki, ulu öndərin varisi, Prezident İlham Əliyev getdikcə qloballaşan və böyük gərginliklər yaşanan müasir dünyada çevik siyasətçi, alternativsiz bir şəxsiyyətdir.
Rayon icra hakimiyyətinin başçısı Nizami Bəhmənov ulu öndər barədə xoş xatirələrini bölüşmüş və diqqətə çatdırmışdır ki, bu tarixi şəxsiyyət dövlətimizin hərtərəfli inkişafına və möhkəmlənməsinə misilsiz töhfələr verərək, onun həm Qərbin, həm də Şərqin siyasi, iqtisadi və mədəni məkanına uğurlu inteqrasiyasını təmin etmişdir.
Tədbirdə Milli Məclisin deputatı Elman Məmmədov iştirak etmişdir.
Bölmənin digər xəbərləri
