DST-NİN BAŞ DİREKTORU VƏZİFƏSİNƏ NAMİZƏDLƏRİN SİYAHISI ELAN EDİLMİŞDİR
AZƏRTAC xarici KİV-lərə istinadla xəbər verir ki, Dünya Səhiyyə Təşkilatına (DST) 2003-cü ildən başçılıq etmiş 61 yaşlı Li Yonq Vukun qəfil vəfatından sonra boş qalmış bu vəzifəyə 5 namizədin adı açıqlanmışdır. DST İcraiyyə Komitəsinin təsdiq etdiyi siyahıya indi DST-də mümkün quş qripi pandemiyasına hazırlığa görə cavabdeh, honkonqlu Marqaret Çan, Kazem Bəhbəhani (Küveyt), Meksikanın səhiyyə naziri Xulio Frenk, DST-nin Asiya-Sakit okean nümayəndəliyinin başçısı Şigeru Omi (Yaponiya) və İspaniyanın səhiyyə naziri Elena Salqado Mendes daxildirlər.
Noyabrın 7-də DST İcraiyyə Komitəsinin üzvləri namizədlərlə müsahibə aparmışdır, növbəti gün isə onlardan birinin namizədliyi Dünya Səhiyyə Assambleyasının müzakirəsinə çıxarılacaqdır.
192 ölkəni birləşdirən Dünya Səhiyyə Təşkilatının yeni baş direktorunun adı Dünya Səhiyyə Assambleyasının noyabrın 9-da keçiriləcək xüsusi sessiyasında elan ediləcəkdir.
Bölmənin digər xəbərləri
