Dünya Gənclər İnkişaf Forumunda Azərbaycandakı gənclər siyasətindən danışılıb
Pekin, 16 iyun, AZƏRTAC
Diasporla İş üzrə Dövlət Komitəsinin dəstəyi, “Böyük İpək Yolu” Beynəlxalq Gənclər İttifaqı və Ümumçin Gənclər Federasiyası ilə əməkdaşlıq çərçivəsində Çinin Şanxay və Uhan şəhərlərində beynəlxalq səviyyəli gənclər proqramları təşkil olunub.
AZƏRTAC xəbər verir ki, tədbirlər “Qlobal Gənclərin İnkişaf Proqramı” çərçivəsində həyata keçirilib və dünyanın müxtəlif ölkələrindən gənc sahibkarları, startap yaradıcılarını, gənc liderləri və ekspertləri bir araya gətirib. Bu il həm də Çin Xalq Respublikasının Sədri Si Cinpinin təşəbbüsü ilə irəli sürülmüş Qlobal Gənclərin İnkişaf Proqramının elan olunmasının beşinci ildönümü qeyd olunur. Bu münasibətlə keçirilən tədbirlər qlobal gənclər əməkdaşlığının inkişafı, innovasiyaların təşviqi və Dayanıqlı İnkişaf Məqsədlərinin həyata keçirilməsində gənclərin rolunun gücləndirilməsinə həsr olunub.
İyunun 11–14-də Şanxayda keçirilən “Gənc sahibkarlar və startap yaradıcıları akselerasiya” təlim proqramında İpək Yolu coğrafiyasını təmsil edən 21 gənc - sahibkar, startap yaradıcısı və ya innovativ layihələrin müəllifləri iştirak edib. Təlim proqramı çərçivəsində texnologiya və innovasiya, süni intellekt, sağlam həyat tərzi, davamlı istehsal və inkişaf, yaradıcı iqtisadiyyat, müasir media, musiqi və mədəniyyət, iqtisadi inkişaf, sahibkarlıq və könüllülük kimi istiqamətlər üzrə müzakirələr aparılıb. İştirakçılar beynəlxalq komandalar şəklində 8 İşçi qrupunda fəaliyyət göstərərək layihələrini inkişaf etdirib, müxtəlif ölkələrdən olan gənc sahibkarlarla əməkdaşlıq imkanlarını müzakirə ediblər. Ümumilikdə proqram çərçivəsində təqdim olunan 200-dən çox startap layihəsi arasından ən perspektivli 50 layihənin seçilərək Dünya Gənclərinin İnkişaf Forumuna təqdim edilməsi nəzərdə tutulub.
Akselerasiya həftəsinin əsas hissələrindən biri olan mentorluq proqramında 20-yə yaxın beynəlxalq mentor və ekspert iştirak edib. Mentorluq sessiyalarında UNICEF-in region üzrə daimi nümayəndəsi, BMT-nin Çin üzrə nümayəndəliyinin təmsilçiləri, Asiya-Sakit Okean regionu üzrə BMT-nin ekspertləri, eləcə də müxtəlif dövrlərdə BMT sistemində çalışmış mütəxəssislər iştirak ediblər. Onlar gənc sahibkarlarla görüşərək innovasiya, biznes idarəçiliyi, investisiya imkanları, marketinq strategiyaları, rəqəmsal transformasiya və beynəlxalq əməkdaşlıq sahələrində təcrübələrini bölüşüblər.
Tədbirdə, həmçinin Çin və digər ölkələrdən olan tanınmış sahibkarlar, akademiklər, startap ekosistemi nümayəndələri və beynəlxalq ekspertlər iştirakçılara beynəlxalq bazarlara çıxış, investisiya cəlbi və qlobal tərəfdaşlıqların qurulması istiqamətində tövsiyələr veriblər.
İyunun 15-də Uhan şəhərində Dünya Gənclərinin İnkişaf Forumu öz işinə başlayıb. Artıq 5-ci dəfə təşkil olunan forum dünyanın müxtəlif ölkələrindən gənc liderləri, sahibkarları, siyasətçiləri, tədqiqatçıları və beynəlxalq təşkilatların nümayəndələrini bir araya gətirir. Açılış mərasimində Çin Kommunist Partiyası Mərkəzi Komitəsinin Gənclər Liqasının birinci katibi A Don, BMT-nin Baş katibinin gənclər məsələləri üzrə köməkçisi Felipe Paullier, BMT-nin Baş katibinin müavini Amina Mohammed, Serbiyanın mədəniyyət naziri Nikola Selakoviç və digər yüksəksəviyyəli qonaqlar çıxış ediblər. Çıxışlarda gənclərin qlobal inkişaf proseslərində iştirakı, Dayanıqlı İnkişaf Məqsədlərinin həyata keçirilməsi, beynəlxalq əməkdaşlığın genişləndirilməsi və gənclərin qərarvermə proseslərinə cəlb olunması məsələləri ön plana çəkilib.
Forum çərçivəsində Şanxayda keçirilmiş Akselerasiya Təlim Proqramının nəticələri təqdim edilib. Seçilmiş iştirakçılar startap layihələrini beynəlxalq auditoriyaya təqdim edib, innovativ təşəbbüsləri barədə məlumat veriblər. Tanınmış sahibkar və “Xiaomi” şirkətinin təsisçisi Ley Cun gənc sahibkarların layihələrini qiymətləndirib, innovasiya və sahibkarlıq sahəsində təcrübəsini bölüşüb.
Forum çərçivəsində keçirilən “Yaradıcı iqtisadiyyat və müasir mədəniyyət” adlı tematik sessiyada Böyük İpək Yolu Beynəlxalq Gənclər İttifaqının prezidenti Aytən Əliyeva çıxış edərək sosial medianın müasir mədəniyyətin ayrılmaz hissəsinə çevrildiyini, onun həm müsbət, həm də mənfi təsirlərinin nəzərə alınmasının vacibliyini qeyd edib. O, mədəniyyətlərarası dialoqun, beynəlxalq əməkdaşlığın və gənclərin birgə fəaliyyətinin gələcək uğurların əsasını təşkil etdiyini vurğulayıb. Aytən Əliyeva, həmçinin Azərbaycanda gənclər siyasəti, beynəlxalq təşkilatlarla əməkdaşlıq, BMT və onun müxtəlif qurumları ilə həyata keçirilən layihələr haqqında məlumat verib. Qeyd edib ki, gənclər Dayanıqlı İnkişaf Məqsədlərinin yalnız faydalanan tərəfi deyil, eyni zamanda, bu məqsədlərin həyata keçirilməsində fəal tərəfdaş olmalıdırlar.
Forum çərçivəsində Dünya Gənclər İnkişaf Federasiyasının İdarə Heyətinə növbəti seçki keçirilib. Böyük İpək Yolu Beynəlxalq Gənclər İttifaqının prezidenti Aytən Əliyeva yenidən təşkilatın İdarə Heyətinin üzvü seçilib.
Forumun ilk gününün sonunda 2026-cı il Dünya Gənclərinin İnkişaf Forumu Gənclər Bəyannaməsi qəbul edilib. Bəyannamədə gənclərin dayanıqlı inkişaf, innovasiya, sahibkarlıq, könüllülük və beynəlxalq əməkdaşlıq sahələrində rolunun gücləndirilməsi ilə bağlı çağırışlar əksini tapıb. Forum çərçivəsində süni intellekt və gənclərin gücləndirilməsi, yaradıcı iqtisadiyyat və müasir mədəniyyət, könüllülük və əməkdaşlıq kimi mövzular üzrə tematik sessiyalarla davam edib.
Akselerasiya Təlim Proqramı və Dünya Gənclərinin İnkişaf Forumu müxtəlif ölkələrdən olan gənclər arasında yeni tərəfdaşlıqların qurulmasına, innovativ ideyaların inkişafına və gələcək beynəlxalq əməkdaşlıq imkanlarının genişlənməsinə mühüm töhfə verəcək.
Bölmənin digər xəbərləri
