DÜNYADA ƏN UZUN SƏRNİŞİN TƏYYARƏSİ
İyulun 24-də Londonda açılmış “Farnboro-2002” beynəlxalq aviasiya salonunda dünyada ən uzun sərnişin təyyarəsi nümayiş etdirilmişdir. “Vercin Atlantik” şirkətinə məxsus A340-600 aerobusunun uzunluğu 75,3 metrdir. Bu, dünyanın ən iri təyyarələrindən təxminən 5 metr uzundur və əslində, standart futbol meydanı boydadır.
Britaniya hərbi-sənaye kompleksinin - “Britiş aerospeys” və “Rolls-Roys” şirkətlərinin birgə istehsalı olan bu təyyarə əlavə yanacaq doldurulmadan 13,5 min kilometr məsafə qət edə bilir və bu zaman yanacağa 20 faiz qənaət edir. Təyyarənin salonu 311 sərnişin üçün nəzərdə tutulmuşdur və texniki yeniliklərlə təchiz edilmişdir. 14 kanallı audiosistemlər, videoteka, 45 kompakt diskli fərdi stereosistemlər, audiokitablar və 15 müxtəlif kompüter oyunu sərnişinlərin ixtiyarına verilmişdir.
İTAR-TASS-ın verdiyi xəbərə görə, “Vercin Atlantik” şirkəti cari ilin sonunadək daha üç, 2006-cı ilədək isə, altı A340-600 təyyarəsini istifadəyə vermək fikrindədir. Yeni təyyarələr ilk vaxtlarda Londondan Nyu-Yorka və Tokioya uçacaqdır. Bu təyyarələrin inşasına sifarişin ümumi məbləği 1,9 milyard dollardır.
Bölmənin digər xəbərləri
