DÜNYADA TURİSTLƏRİN SAYI DURMADAN ARTIR
AZƏRTAC xəbər verir ki, Dünya Turizm Təşkilatının (DTT) məlumatına görə, dünyada turistlərin sayı durmadan artır. 2006-cı ilin 8 ayı ərzində 578 milyon nəfər xarici ölkələrə səyahət etmişdir ki, bu da ötən ilin müvafiq dövrü ilə müqayisədə 25 milyon nəfər çoxdur. Ötən il dünya turizmi üçün rekord ili olmuşdur. Ümumilikdə başqa ölkələrə 806 milyon adam getmişdir. 2006-cı ildə turistlərin sayının 2005-ci ildəkinə nisbətən 4,6 faiz çox olacağı proqnozlaşdırılır. Ən çox turist (9,8 faiz) Afrika istiqamətində, o cümlədən Cənubi Afrika, Keniya, Mozambik və Svazilendə səyahətə çıxmışdır. İkinci populyar istiqamət Asiya və Sakit okean ölkələridir. Mürəkkəb siyasi vəziyyətinə baxmayaraq, Yaxın Şərq dövlətləri üçüncü yeri tuturlar.
Şərqi Avropa və keçmiş SSRİ turistləri getdikcə az cəlb edən regionlardan biridir. Ötən illə müqayisədə bu regiona gələn turistlərin sayı 0,1 faiz azalmışdır.
Bölmənin digər xəbərləri
